လာဘ်ပေးလာဘ်ယူ၏ အန္တရာယ်နှင့် သမ္မာကျမ်းစာ၏ သွန်သင်ချက်
ကမ္ဘာပေါ်မှာ လာဘ်ပေးလာဘ်ယူဆိုတာ လုံးဝမရှိတဲ့ နိုင်ငံဆိုတာ အလွန်ရှားပါတယ်။ ပေါ်တင်လုပ်တာနဲ့ တိတ်တဆိတ်လုပ်တာပဲ ကွာပြီး ဘယ်သူမဆို ဒီလိုအလေ့အထကနေ ကင်းလွတ်ဖို့ ခက်ပါတယ်။ အထူးသဖြင့် မြန်မာနိုင်ငံမှာဆိုရင် ဒီပြဿနာဟာ ဆိုးရွားတဲ့ အဆင့်မှာ ရှိတယ်။ လာဘ်မပေးရင် အဆင်မပြေတဲ့ ကိစ္စတွေ အများကြီးရှိတယ်။ ဒါဆိုရင် ခရစ်ယာန်တွေအနေနဲ့ ဒီလောကထုံးစံအတိုင်း လာဘ်
ပေးလာဘ်ယူ လုပ်ရမှာလား? သမ္မာကျမ်းစာက ဒီအကြောင်းကို ဘာပြောလဲ? အတူလေ့လာကြည့်ရအောင်။ဟေဗြဲနဲ့ ဂရိဘာသာစကားမှာ “လာဘ်ပေးလာဘ်ယူ” ဆိုတဲ့ စကားလုံးတိတိကျကျ မရှိပေမယ့် အနီးစပ်ဆုံး အဓိပ္ပာယ်တူတဲ့ စကားလုံးတွေဖြစ်တဲ့ “တံစိုး”၊ “လက်ဆောင်”၊ “နှစ်သိမ့်ခ”၊ “ရွေးနုတ်ခ”၊ “လုပ်အားခ”၊ “ပူဇော်ခ” စတဲ့ အသုံးအနှုန်းတွေကို သုံးကြတယ်။ ဘယ်စကားလုံးသုံးသုံး ဒီလိုကိစ္စတွေကို သမ္မာကျမ်းစာက လုံးဝလက်မခံဘူး။ ကျမ်းစာက ဒီလိုပြောတယ်။ “သင်သည် တံစိုးမစားရ။ တံစိုးသည် ပညာရှိတို့၏ မျက်စိကို ကွယ်စေ၍ ဖြောင့်မတ်သောသူတို့၏ စကားကို လွဲစေတတ်၏” (ထွက် ၂၃:၈)။ “သင်သည် တရားလမ်းမှ မလွှဲရ။ လူမျက်နှာကို မထောက်ရ။ တံစိုးကို မစား” (တရား ၁၆:၁၉)။ “မတရားသောသူသည် တရားလမ်းကို ဖျက်သော အဖိုးတံစိုးကို… နှိုက်ယူတတ်၏” (သု ၁၇:၂၃)။ “အပြစ်တို့ကို ငါသိ၏… တံစိုးစားတတ်ကြ၏” (အာ ၅:၁၂)။
ဓမ္မသစ်ကျမ်းမှာလည်း “လာဘ်ပေးလာဘ်ယူ” ဆိုတဲ့ စကားလုံးတိုက်ရိုက်မရှိပေမယ့် မဖြစ်မနေ မတရားတဲ့ ရည်ရွယ်ချက်နဲ့ ငွေပေးငွေယူတဲ့ ဥပမာတွေ ရှိတယ်။ ဥပမာ၊ ယုဒရှကာရုတ်က ယေရှုကို တိတ်တဆိတ် ရောင်းစားတာ (မ ၂၆:၁၄-၁၆)၊ ယေရှုရှင်ပြန်ထမြောက်တာကို မပြောဖို့ သင်္ချိုင်းစောင့်တွေကို ငွေပေးတာ (မ ၂၈:၁၂)၊ မင်းကြီးကို ငွေပေးရင် ပေါလုလွတ်မြောက်မယ်ဆိုတဲ့ ကိစ္စ (တ ၂၅:၂၆) စတဲ့ ဖြစ်ရပ်တွေဟာ လာဘ်ပေးလာဘ်ယူလုပ်ရပ်တွေပဲ ဖြစ်တယ်။
သမ္မာကျမ်းစာထဲမှာ ဘုရားသခင်က ရွံရှာတဲ့ “လာဘ်ပေးလာဘ်ယူ” ဆိုတာက မိမိရထိုက်တဲ့အရာမဟုတ်တာကို ရဖို့ ငွေပေးငွေယူလုပ်တာပဲ။ ဒါကြောင့် ဒီလိုလုပ်ရပ်တွေကို လုံးဝရှောင်ရမယ်။ ဒါပေမယ့် မိမိရထိုက်တဲ့ အရာတစ်ခုကို တစ်စုံတစ်ယောက်ရဲ့ မျှော်လင့်ချက်ကြောင့် နှောင့်နှေးနေရတာမျိုးကတော့ လာဘ်ပေးလာဘ်ယူလုပ်ရပ်မဟုတ်ဘဲ အချိန်နဲ့ နေရာကို လိုက်ပြီး ဉာဏ်ပညာနဲ့ ဆောင်ရွက်ဖို့ လိုတယ်။
ဆင်ခြင်လုပ်ဆောင်ရန်
- လာဘ်ပေးလာဘ်ယူလုပ်ရပ်တွေကို ရှောင်ကြဉ်ပြီး ဖြောင့်မတ်တဲ့ ဘဝနေထိုင်မှုကို ဦးစားပေးပါ။
- မိမိရထိုက်တဲ့ အရာတွေကို ရဖို့ နှောင့်နှေးနေရင် ဉာဏ်ပညာနဲ့ ဆင်ခြင်ပြီး တရားမဝင်တဲ့ နည်းလမ်းတွေကို မသုံးပါနဲ့။
- ဘုရားသခင်ရဲ့ သွန်သင်ချက်အတိုင်း တရားမျှတမှုနဲ့ ဖြောင့်မတ်မှုကို အမြဲစွဲကိုင်ထားပါ။
Comments
Post a Comment