ဘုရားသခင်ကို လေးမြတ်ရာမှ ကျိန်ဆဲခြင်း၏ အန္တရာယ်
ဘုရားသခင်ရဲ့ နာမတော်ကို မလေးမစားပြုတာဟာ ဓမ္မဟောင်းကျမ်းနဲ့ ယုဒလူမျိုးတွေရဲ့ ဓလေ့ထုံးတမ်းမှာ ဘုရားသခင်ကို ကျိန်ဆဲတဲ့လုပ်ရပ်ဖြစ်ပြီး ဒီလိုလုပ်တဲ့သူတွေကို ကျောက်ခဲနဲ့ ပစ်သတ်ရမယ်လို့ ဆိုထားတယ် (ဝတ် ၂၄:၁၀-၁၆)။ ဒါကြောင့် ယုဒလူမျိုးတွေဟာ ဘုရားသခင်ရဲ့ နာမတော်ကို မလွန်ကျူးမိအောင် YHWH ဆိုတဲ့ နာမည်ကို တောင် မခေါ်ရဲကြဘူး။ ဟေဗြဲကျမ်းစာဖတ်တဲ့အခါတိုင်း YHWH ဆိုတဲ့ စကားလုံးကို Adonai လို့ပဲ ဖတ်ကြတယ်။ ဒါတင်မကဘူး၊ ဘုရားသခင်ရွေးကောက်ထား
တဲ့ ခေါင်းဆောင်တွေကို ကျိန်ဆဲတဲ့သူကိုလည်း ကျောက်ခဲနဲ့ ပစ်သတ်နိုင်တယ်လို့ ဆိုထားတယ် (ထွက် ၂၂:၂၈)။၁) အပြစ်ကို ခွင့်လွှတ်ပေးတဲ့ ယေရှုခရစ်ကို လူထုက ဘုရားသခင်ရဲ့ နာမတော်ကို လွန်ကျူးတယ်လို့ စွပ်စွဲကျိန်ဆဲကြတယ် (မာ ၂:၇)။
၂) သန့်ရှင်းသောဝိညာဉ်တော်ရဲ့ တန်ခိုးနဲ့ နိမိတ်လက္ခဏာတွေ ပြသတဲ့ ယေရှုကို လူထုက နတ်ဆိုးရဲ့ လုပ်ရပ်လို့ စွပ်စွဲကြတယ်။ ဒီလိုစွပ်စွဲတာဟာ ဝိညာဉ်တော်ကို ကဲ့ရဲ့ရာရောက်ပြီး အပြစ်မလွှတ်နိုင်ဘူးလို့ ယေရှုက မိန့်ဆိုတယ် (မာ ၃:၂၉)။ တကယ်ပဲ၊ ဝိညာဉ်တော်ရဲ့ တန်ခိုးကို နတ်ဆိုးရဲ့ တန်ခိုးလို့ စွပ်စွဲပြီး ယေရှုကို မယုံကြည်ဘဲ နေရင် မယုံကြည်တဲ့ အပြစ်ကြောင့် ထာဝရဒုက္ခဆီသို့ ကျရောက်သွားမှာပါ။ အလားတူပဲ၊ နတ်ဆိုးရဲ့ တန်ခိုးကို ဝိညာဉ်တော်ရဲ့ တန်ခိုးလို့ မှားယွင်းလက်ခံမိရင်လည်း ဝိညာဉ်တော်ကို ကဲ့ရဲ့ရာရောက်ပါတယ်။
ဒါကြောင့် နိမိတ်လက္ခဏာတစ်ခုခု ဖြစ်ပေါ်လာတိုင်း ချက်ချင်း ဝိညာဉ်တော်ရဲ့ တန်ခိုးလို့ မသတ်မှတ်လိုက်ပါနဲ့။
၃) ယုဒခေါင်းဆောင်တွေက ယေရှုဟာ ဘုရားသခင်ကို လွန်ကျူးတယ်လို့ စွပ်စွဲကြတယ် (မာ ၁၄:၅၃-၆၅)။ သူတို့မှာ အကြောင်းပြချက် နှစ်ခုရှိတယ်။ ယေရှုကို “သင်ဟာ ခရစ်တော်လား” လို့ မေးတဲ့အခါ ယေရှုက (က) “မှန်ပါတယ်” လို့ ဖြေတယ်။ ဒီလိုဖြေတာဟာ ဘုရားသခင်ရဲ့သားတော် မေရှိယဖြစ်တယ်လို့ ဝန်ခံရာရောက်တာကြောင့် ယုဒတွေရဲ့ အမြင်မှာ နာမတော်ကို လွန်ကျူးရာရောက်သွားတယ်။
ဒါကြောင့် ယေရှုကို သတ်ပစ်ချင်ကြတာပါ။ (ခ) ယေရှုက ခရစ်တော်ဖြစ်တယ်လို့ ဝန်ခံရုံတင်မကဘဲ၊ ယုဒတွေကို တရားစီရင်မယ့်သူဖြစ်တယ်လို့ပါ ပြောလိုက်တယ်။ ဒါဟာ ယုဒတွေရဲ့ အမြင်မှာ ခေါင်းဆောင်တွေကို လွန်ကျူးရာရောက်တာကြောင့် ယေရှုကို သတ်ပစ်ချင်ကြတာပါ။
ဘုရားသခင်ရဲ့ နာမတော်ကို လွန်ကျူးတာနဲ့ ဘုရားသခင်ရဲ့ အမှုတော်ဆောင်တွေကို မထီမဲ့မြင်ပြုတာဟာ ကြီးလေးတဲ့ အပြစ်ဖြစ်ပြီး ကျောက်ခဲနဲ့ ပစ်သတ်ခွင့်ရှိတယ်။ ဘုရားသခင်ကို လေးမြတ်တယ်ဆိုရင် သူရွေးကောက်ထားတဲ့ ခေါင်းဆောင်တွေကိုလည်း လေးစားကြပါ။ ဘုရားသခင်ရွေးကောက်တဲ့ ခေါင်းဆောင်တွေကို မလေးစားတာဟာ ဘုရားသခင်ကိုပါ မလေးမြတ်ရာရောက်သွားတယ်။
ဆင်ခြင်လုပ်ဆောင်ရန်
- ဘုရားသခင်ရဲ့ နာမတော်ကို အမြဲလေးမြတ်ပြီး စကားလုံးတွေကို သတိထားအသုံးပြုပါ။
- နိမိတ်လက္ခဏာတွေကို ဝိညာဉ်တော်ရဲ့ တန်ခိုးလို့ အလျင်စလို မဆုံးဖြတ်ခင် ဉာဏ်ပညာနဲ့ ဆင်ခြင်ပါ။
- ဘုရားသခင်ရွေးကောက်ထားတဲ့ ခေါင်းဆောင်တွေကို လေးစားပြီး သူတို့ရဲ့ အမှုတော်ကို ထောက်ပံ့ကူညီပါ။
Comments
Post a Comment