စိတ်သောကထဲမှငြိမ်သက်ခြင်း

               ဘဝခရီးလမ်းတွင် စိုးရိမ်ပူပန်မှုများနှင့် ပြဿနာများ ကြုံတွေ့ရခြင်းသည် မလွှဲမရှောင်သာ ဖြစ်လာတတ်သည်။ တစ်ခါတစ်ရံ ပြဿနာများသည် ကြီးမားလွန်းသဖြင့် ကျွန်ုပ်တို့၏ စိတ်နှလုံးကို ဖိစီးမှုနှင့် မသေချာမှုများဖြင့် လွှမ်းမိုးသွားစေသည်။ သို့သော် ထိုသို့သော အချိန်မျိုးတွင် ကျွန်ုပ်တို့အား မျှော်လင့်ချက်နှင့် ခွန်အားပေးသော နှုတ်ကပတ်တော်တစ်ခုရှိသည်။ မဿဲခရစ်ဝင် ၁၁:၂၈-၃၀ တွင် ယေရှုက “၀န်လေး၍ ပင်ပန်းသော သူအပေါင်းတို့၊ ငါ့ထံသို့ လာကြလော့။ ငါသည် နားရသော

အခွင့်ကို ပေးမည်။ ငါ့ထမ်းပိုးကို တင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့ နှိမ့်ချသော စိတ်သဘောရှိ၏။ သင်တို့ စိတ်နှလုံးသည် သက်သာခြင်းကို ရလိမ့်မည်။  အကြောင်းမူကား၊ ငါ့ထမ်းပိုးသည် ထမ်းလွယ်၏။ ငါ့ဝန်လည်း ပေါ့၏” ဟု မိန့်တော်မူသည်။

 

         ဤကျမ်းစကားသည် ကျွန်ုပ်တို့အား ဖိတ်ခေါ်စကားတစ်ခုဖြစ်သည်။ ဘဝ၏ဝန်ထုပ်ဝန်ပိုးများကို ကိုယ်တိုင်ထမ်းရွက်ရန် ကြိုးစားနေစရာမလိုဘဲ၊ ထိုဝန်များကို ဘုရားသခင်ထံသို့ ယူဆောင်လာရန် ဖိတ်ခေါ်ခြင်းဖြစ်သည်။ စိုးရိမ်ပူပန်မှုများသည် ကျွန်ုပ်တို့၏ စိတ်နှလုံးကို ဖိစီးနေချိန်တွင်၊ ဘုရားသခင်သည် ထိုဝန်များကို သူ၏လက်တော်ထဲသို့ လွှဲပြောင်းယူပြီး ကျွန်ုပ်တို့အား ငြိမ်သက်ခြင်းနှင့် အနားယူမှုကို ပေးအပ်မည်ဟု ကတိပြုထားသည်။ “ငါ့ထမ်းပိုးကို တင်၍ ထမ်းကြလော့။ ငါ့ထံ၌ နည်းခံကြလော့။ ငါသည် နူးညံ့သိမ်မွေ့ နှိမ့်ချသော စိတ်သဘောရှိ၏။ သင်တို့ စိတ်နှလုံးသည် သက်သာခြင်းကို ရလိမ့်မည်။” ဟူသော သခင်ယေရှု၏ နှုတ်ကပတ်တော်သည် ကျွန်ုပ်တို့အား သူ၏ ချစ်ခြင်းမေတ္တာနှင့် ဂရုစိုက်မှုကို ယုံကြည်ရန် အားပေးသည်။

 

          သင့်ဘဝတွင် ယခုအချိန်၌ မည်သည့်အရာက သင့်အပေါ် ဖိစီးနေသနည်း။ အလုပ်ပြဿနာ၊ မိသားစုကိစ္စ၊ ကျန်းမာရေးစိုးရိမ်မှု၊ သို့မဟုတ် အနာဂတ်အတွက် မသေချာမှုများလား။ ထိုအရာများကို ဘုရားသခင်ထံသို့ ယူဆောင်လာပြီး ဘုရားရှင်၏ ကတိတော်ကို ယုံကြည်ကိုးစားကြည့်ပါ။ သူ၏ထမ်းဘိုးသည် ပေါ့ပါးပြီး၊ သူ၏ဝန်သည် လွယ်ကူသည်ဟု ကျမ်းစာက ဆိုသည်။ ဆိုလိုသည်မှာ ဘုရားသခင်နှင့်အတူ လျှောက်လှမ်းသောအခါ၊ ကျွန်ုပ်တို့သည် တစ်ယောက်တည်း ရုန်းကန်နေရခြင်း မဟုတ်တော့ဘဲ၊ သူ၏ ခွန်အားနှင့် ငြိမ်သက်ခြင်းကို ရရှိမည်ဖြစ်သည်။

 

         စိတ်သောကရောက်ချိန်တိုင်းတွင် ဤကျမ်းစကားကို ပြန်လည်အမှတ်ရပြီး ဆုတောင်းပဌနာပြုပါ။ “သခင်၊ ကျွန်ုပ်၏ ဝန်ထုပ်ဝန်ပိုးများကို ကိုယ်တော်ထံသို့ ယူဆောင်လာပါ၏။ ကျွန်ုပ်အား မစတော်မူပါ” ဟု ရိုးရှင်းစွာ ဆုတောင်းပါ။ ထို့နောက် သူ၏ ငြိမ်သက်ခြင်းသည် သင့်စိတ်နှလုံးကို ဖြည့်စွမ်းပေးမည်ကို ယုံကြည်ပါ။ ဘဝ၏ မည်သည့်အခက်အခဲကိုမဆို ဖြတ်ကျော်ရန် ဘုရားသခင်သည် သင့်အား ခွန်အားပေးမည်ဖြစ်ကြောင်း သတိရပါ။ သင်သည် တစ်ယောက်တည်း မဟုတ်ပါ။ သူသည် သင်နှင့်အတူ အမြဲရှိနေပါသည်။

JK