အသက်ရှင်သောယုံကြည်ခြင်း
၁ ကောရိန္သု ၁၅း၁၄ တွင် ပေါလုက “ခရစ်တော်သည် ထမြောက်တော်မမူလျှင်၊ ငါတို့ ဟောပြောခြင်းသည် အကျိုးမရှိ၊ သင်တို့ ယုံကြည်ခြင်းသည်လည်း အကျိုးမရှိ” ဟု ကြေညာထားသည်။ ဤကျမ်းပိုဒ်သည် ခရစ်ယာန်ယုံကြည်ခြင်း၏ အဓိကဖြစ်သော ခရစ်တော်၏ ထမြောက်ခြင်းကိုဖေါ်ပြထားသည်။
ခရစ်တော်၏ ထမြောက်ခြင်းမရှိလျှင် ကျွန်ုပ်တို့၏ မျှော်လင့်ခြင်းသည် အချည်းနှီးဖြစ်ပြီး ကျွန်ုပ်တို့၏ ယုံကြည်ခြင်းသည် အဓိပ္ပါယ်မရှိပေ။ သို့သော် ခရစ်တော်သည် ထမြောက်တော်မူပြီဖြစ်သောကြောင့် သူ၏ ရှိနေခြင်းသည် ကျွန်ုပ်တို့အား ခွန်အားပေးကာ ကျွန်ုပ်တို့၏ အသက်တာများကို အဓိပ္ပာယ်ပြည့်၀စေပြီး ဝိညာဉ်ရေးရာထာ၀ရအကျိုးကို ပေးခဲ့ပါသည်။
#ဧမောက်လမ်းခရီး၏ဥပမာ (လုကာ ၂၄း၁၃-၃၅)
ဧမောက်လမ်းပေါ်ရှိ တပည့်နှစ်ဦး၏ အဖြစ်အပျက်ကို ဆင်ခြင်ကြည့်ပါ။ ယေရှုခရစ်တော်သည် ကားတိုင်ပေါ်တွင် အသေခံတော်မူပြီးနောက် ဤတပည့်နှစ်ဦးသည် စိတ်ပျက်အားလျော့ကာ စိတ်ရှုပ်ထွေးပြီး မျှော်လင့်ခြင်းမဲ့သလိုဖြစ်နေခဲ့ကြသည်။
သူတို့သည် ဧမောက်ရွာသို့ အတူလျှောက်လာခဲ့ကြပြီး ထမြောက်တော်မူသော ခရစ်တော်သည် သူတို့နှင့်အတူ လျှောက်လှမ်းနေကြောင်း မသိခဲ့ကြပေ။ အစပိုင်းတွင် သူတို့၏ မျက်စိများသည် သူ့ကို မမှတ်မိနိုင်အောင် ဖုံးကွယ်ခံထားရသည် (လုကာ ၂၄း၁၆)။ သို့သော် ခရစ်တော်သည် သူတို့နှင့် စကားပြောဆိုရင်း ကျမ်းစာများကို ရှင်းပြတော်မူသောအခါ သူတို့၏ နှလုံးသားများသည် တစ်မျိုးတစ်ဖုံ လောင်ကျွမ်းနေသည်ဟု ခံစားခဲ့ကြသည် (လုကာ ၂၄း၃၂)။
နောက်ဆုံးတွင် ယေရှုသည် မုန့်ဖုတ်ရာတွင် မိမိကိုယ်ကို ထင်ရှားစေသောအခါ သူတို့၏ မျက်စိများ ဖွင့်လှစ်ခံရပြီး သူတို့၏ စိတ်ပျက်အားငယ်မှုသည် ဝမ်းမြောက်ခြင်းအဖြစ်သို့ ပြောင်းလဲသွားခဲ့သည်။ ထို့နောက် သူတို့သည် ခရစ်တော် ထမြောက်တော်မူကြောင်း သတင်းကောင်းကို ဝေမျှရန် အလျင်အမြန် ပြန်လှည့်သွားခဲ့ကြသည်။
ဤအဖြစ်အပျက်သည် ခရစ်တော်၏ ရှိနေခြင်းသည် မျှော်လင့်ချက်မရှိသော အခိုက်အတန့်များကိုပင် ပြောင်းလဲပေးနိုင်ကြောင်း သက်သေပြသည်။ ကျွန်ုပ်တို့သည် ခရစ်တော်ကို မမြင်နိုင်သော်လည်း သူသည် ကျွန်ုပ်တို့နှင့် အမြဲရှိနေပြီး လမ်းပြပေးနေပါသည်။
ခရစ်တော်၏ အသက်ရှင်ခြင်း၏ သမ္မာတရားသည် ကျွန်ုပ်တို့၏ ဝိညာဉ်ရေးရာ ယုံကြည်ကိုးကွယ်ခြင်း၏ အခြေခံအုတ်မြစ်ဖြစ်သည်။
ကျွန်ုပ်တို့သည် ဆုတောင်းခြင်း၊ ဝတ်ပြုခြင်းနှင့် နာခံခြင်းဖြင့် သူ့ထံသို့ နီးကပ်စွာ ချဉ်းကပ်ကြပါစို့၊ ခရစ်တော်သည် ယနေ့အသက်ရှင်ပြီး ကျွန်ုပ်တို့နှင့်အတူ အမြဲရှိနေကြောင်း ယုံကြည်စိတ်ချပါ။
ထို့ကြောင့် ထမြောက်တော်မူပြီး အသက်ရှင်ဘုရားကို ယုံကြည်ခြင်းဖြစ်သောကြောင့် ကျွန်ုပ်တို့၏ ယုံကြည်ခြင်းသည် အချည်းနှီးမဟုတ်ပဲ အဓိပ္ပါယ်ရှိသော၊ အကျိုးရှိသော၊ အလွန်မြင့်မြတ်သော၊ ထူးခြားသော၊ အသက်ရှင်သော ယုံကြည်ဖြစ်ပေသည်။
John Kay
Comments
Post a Comment