မင်္ဂလာရှိသူ

                   ဗျာဒိတ်ကျမ်း ၁:၃ တွင် ဘုရားသခင်၏ နှုတ်ကပတ်တော်သည် ကျွန်ုပ်တို့အား အံ့ဖွယ်ကောင်းသော ကတိတော်တစ်ခုကို ပေးထားသည်။ “ကာလအချိန် ရောက်လုနီးပြီဖြစ်၍၊ ဤအနာဂတ္တိ ကျမ်းစကားကို ကြည့်ရှုဖတ်ရွတ်နားထောင်၍၊ ရေးထားသမျှတို့ကို စောင့်ရှောက်သောသူတို့သည် မင်္ဂလာရှိကြ၏။” ဤကျမ်းပိုဒ်သည် ဘုရားသခင်၏ နှုတ်ကပတ်တော်နှင့် နီးကပ်စွာ ဆက်သွယ်နေထိုင်သော သူတို့အတွက် မင်္ဂလာရှိမှုကို ရည်ညွှန်းပြီး၊ ထိုမင်္ဂလာရှိမှု၏ အဓိပ္ပါယ်ကို နက်ရှိုင်းစွာ ဆင်ခြင်ရန် ဖိတ်ခေါ်ထားသည်။

                       မင်္ဂလာရှိသူဖြစ်ရန် ပထမဆုံးအချက်မှာ ဗျာဒိတ်ကျမ်းကို “ဖတ်ရှုခြင်း” ဖြစ်သည်။ ဖတ်ရှုခြင်းသည် စာသားကို မျက်စိဖြင့် ကြည့်ရုံမျှသာမက၊ စိတ်နှလုံးဖြင့် နားလည်ရန် ကြိုးစားခြင်းကိုပါ ဆိုလိုသည်။ ဒုတိယအချက်မှာ “ကြားနာခြင်း” ဖြစ်ပြီး၊ ၎င်းသည် ဘုရားသခင်၏ အသံကို နားထောင်ရန်နှင့် သူ၏အလိုတော်ကို ခံယူရန် နှလုံးဖွင့်ထားခြင်းကို ဖော်ပြသည်။ တတိယအချက်မှာ “စောင့်ရှောက်သောသူ” ဖြစ်ပြီး၊ ကျွန်ုပ်တို့၏ နေ့စဉ်ဘဝတွင် ကျမ်းစာကို လက်တွေ့အသက်ရှင်စေခြင်းဖြစ်သည်။

                ဤကျမ်းပိုဒ်က “ကာလအချိန် ရောက်လုနီးပြီ” ဟု ဖော်ပြထားသည်။ ဤစကားသည် ကျွန်ုပ်တို့အား ဘုရားသခင်၏ ကယ်တင်ခြင်းအစီအစဉ်နှင့် နီးကပ်စွာရှိနေကြောင်း သတိပေးသည်။ ထို့ကြောင့် ဗျာဒိတ်ကျမ်းကို ဖတ်ရှု၊ ကြားနာ၊ ကျင့်သုံးသောသူများသည် ဘုရားသခင်၏ ကတိတော်များကို လက်ခံရရှိပြီး၊ သူ၏ အနီးကပ်တည်ရှိမှုကို ခံစားရကာ မင်္ဂလာရှိသူများ ဖြစ်လာကြသည်။ ဤမင်္ဂလာရှိမှုသည် ရုပ်ဝတ္ထုဆိုင်ရာ ကြွယ်ဝမှုထက်၊ ဝိညာဉ်ရေးရာတွင် ဘုရားသခင်နှင့် ဆက်သွယ်မှုကို ဆိုလိုသည်။

                မင်္ဂလာရှိသူဖြစ်ရန် ကျွန်ုပ်တို့သည် နှုတ်ကပါတ်တော်ကို အချိန်ပေးဖတ်ရှုရန်၊ ၎င်းမှ သင်ယူချက်များကို နာခံရန်နှင့် ထိုသင်ယူချက်များကို ကျွန်ုပ်တို့၏ ဘဝတွင် အကောင်အထည်ဖော်ရန် လိုအပ်သည်။ ဤသည်မှာ တစ်ကြိမ်တည်းဖြစ်ရပ်မဟုတ်ဘဲ၊ နေ့စဉ်ဘဝ၏ အဓိကလုပ်ဆောင်ချက်ဖြစ်သင့်သည်။ ထိုသို့ပြုလုပ်ခြင်းဖြင့် ကျွန်ုပ်တို့သည် ဘုရားသခင်၏ မင်္ဂလာကောင်းကျိုးကို အပြည့်အဝ ခံစားရမည်ဖြစ်သည်။

                ဤကျမ်းပိုဒ်သည် ကျွန်ုပ်တို့အား သတိပေးရုံသာမက၊ လမ်းပြပေးသောအရာ လည်းဖြစ်သည်။ ထို့ကြောင့် ဤကျမ်းစာကို ဖတ်ရှု၊ ကြားနာ၊ ကျင့်သုံးလျှက်အသက်ရှင်ပါ။

အချိန်သည် နီးကပ်လာပြီဖြစ်သောကြောင့်၊ မင်္ဂလာရှိသူများဖြစ်ဖို့ လက်တွေ့ အသက်ရှင်ကြပါစို့။

 

#SawKay@JohnKay