ယေရှုခရစ်တော်၌ ထာဝရအသက်

           ရှေးဦးစွာ ဘုရားသခင်၏ နာမတော်ကို ချီးမွမ်းပါသည်။ အသက်ရှင်တော်မူသော ထာဝရဘုရား၏ နှုတ်ကပတ်တော်မှ ခွန်အားယူနိုင်ရန် ယောဟန် ၃:၁၆ ကို ဖတ်ရှုချင်ပါသည်။ “ဘုရားသခင်သည် လောကီသားတို့ကို အလွန်ချစ်တော်မူသဖြင့် မိမိ၌ တစ်ပါးတည်းသော သားတော်ကို စွန့်တော်မူ၍ သားတော်ကို ယုံကြည်သောသူအပေါင်းတို့သည် ပျက်စီးခြင်းသို့ မရောက်ဘဲ ထာဝရအသက်ကို ရစေရန် ပေးတော်မူ

ခဲ့သည်။”

         ယနေ့ ကျမ်းစာအားဖြင့် ပြန်ကြည့်သောအခါ ဘုရားသခင်၏ သားတော်ကို ယုံကြည်သူသည် ထာဝရအသက်ကို ရရှိသည်ဟု ဖော်ပြထားသည်။ အဘယ်ကြောင့်ဆိုသော် လူသားအားလုံးသည် ထာဝရအသက်ကို လိုအပ်နေကြသည်။ ထာဝရအသက် အဘယ်ကြောင့် လိုအပ်သနည်းဆိုလျှင် လူသားအားလုံးသည် ထာဝရအသက်ကို ဆုံးရှုံးထားသောကြောင့်ဖြစ်သည်။ ကမ္ဘာဦးကျမ်းတွင် ဖော်ပြထားသည့်အတိုင်း ဘုရားသခင်သည် လူသားများကို ဖြောင့်မတ်စွာ ဖန်ဆင်းခဲ့သော်လည်း၊ အာဒံ၏ ဘုရားစကား မနာခံမှုကြောင့် လူသားတို့၏ အခြေအနေသည် ကျဆင်းသွားခဲ့ပြီး ထာဝရအသက် ဆုံးရှုံးသူများ ဖြစ်လာခဲ့သည်။ 

တကယ်တော့ လူသားအားလုံး ထာဝရအသက်ရရှိရန်အတွက် ခရစ်တော်သည် ဤလောကသို့ ကြွလာခဲ့သည်။ ယေရှုခရစ်တော်၌ ထာဝရအသက်ရှိသည်ဟု ကျမ်းစာက ဖော်ပြထားသည်။ ထိုထာဝရအသက်ကို ရရှိနိုင်သည့် နည်းလမ်းမှာ ယေရှုခရစ်တော်ကို မိမိ၏ ကယ်တင်ရှင်အဖြစ် လက်ခံယုံကြည်ခြင်းပင်ဖြစ်သည်။ ယေရှုခရစ်တော်သည် လူသားအားလုံးကို စီရင်ရန် ကြွလာခြင်းမဟုတ်ဘဲ၊ လူသားအားလုံး၏ အပြစ်များကို ကယ်တင်ရန် ကြွလာခဲ့သည်။ ထိုသို့ ကယ်တင်ရန်အတွက် လက်ဝါးကပ်တိုင်ပေါ်တွင် ဒဏ်ရာဒဏ်ချက်များနှင့် အသက်ပေးဆပ်ခဲ့သည်။ 

ယောဟန် ၃:၁၈ ၌ “သားတော်ကို ယုံကြည်သောသူသည် အပြစ်စီရင်ခြင်းကို မခံရ” ဟု ဖော်ပြထားသည်။ ဘုရားသခင်၏ တစ်ပါးတည်းသော သားတော်ကို ယုံကြည်သူများသည် အပြစ်စီရင်ခြင်းမှ လွတ်ကြသည်။ သို့သော် မယုံကြည်သူများသည် ယခုပင် အပြစ်စီရင်ခြင်းကို ခံရမည်ဟု ဆိုထားသည်။ လူသားတို့တွင် ရွေးချယ်စရာ နှစ်ခုသာ ရှိသည်—ဘုရားသခင်၏ တစ်ပါးတည်းသော သားတော်ကို ယုံကြည်မည်၊ မယုံကြည်ဘူးလား ဆိုသည့် ရွေးချယ်မှု နှစ်ခုသာဖြစ်သည်။ 

ယေရှုခရစ်တော်ကို ယုံကြည်သူသည် ထာဝရအသက်ကို ရရှိပြီး အပြစ်မှ လွတ်မြောက်မည်။ မယုံကြည်သူသည် အပြစ်စီရင်ခြင်းဟူသော သေခြင်းကို ခံရမည်။ ဘုရားသခင်၏ သားတော်ကို မယုံကြည်သူသည် ဆုံးရှုံးပျက်စီးခြင်းဟူသော ထာဝရခံစားမှုကို ငရဲ၌ ခံစားရမည် ဖြစ်သည်။ ကျွန်ုပ်တို့ အသက်ရှင်စဉ် ရွေးချယ်စရာ နှစ်ခုသာ ရှိသည်—ဘုရားသခင်၏ ကယ်တင်ခြင်းကို လက်ခံယုံကြည်မည်၊ မယုံကြည်ဘူးလား ဆိုသည့် ရွေးချယ်မှု နှစ်ခုသာဖြစ်သည်။ 

ကျွန်ုပ်တို့ လူသားအားလုံးသည် အပြစ်ထဲမှ မွေးဖွားလာကြပြီး အပြစ်ကို အမြဲပြုလုပ်နေကြသူများ ဖြစ်သည်။ မကောင်းသော အရာများကို တွေးတော၍ မကောင်းသော အရာများကို ပြုလုပ်နေကြသည်။ “ကုသိုလ်တစ်ပဲ၊ ငရဲတစ်ပိဿာ” ဆိုသော စကားအတိုင်း မကောင်းသော အကျင့်များက ပိုများနေပြီး ကောင်းသော အကျင့်များက အနည်းငယ်သာ ရှိသည်။ အချို့သည် ကောင်းသော အရာများကို လုံးဝမပြုလုပ်နိုင်ကြသူများလည်း ရှိသည်။ 

အချို့က တရားအားထုတ်၍ ကျင့်ကြံနေကြသူများလည်း ရှိသော်လည်း၊ ဘုရားသခင်၏ နည်းလမ်းမဟုတ်ဘဲ ကိုယ်တိုင်လုပ်ဆောင်နေသော အရာများကို ဘုရားသခင်က လက်မခံနိုင်ပါ။ ကျွန်ုပ်တို့၏ အခြေအနေကို စဉ်းစားရန် လိုအပ်လာသည်။ ငါဘယ်ကလာသနည်း။ ဘယ်ကမွေးဖွားလာသနည်း။ ငါ၏ ဖြစ်တည်မှုသည် ဘုရားသခင်၏ အမြင်တွင် မည်သို့ရှိသနည်းဆိုတာကို တိကျစွာ သိရန် လိုအပ်သည်။ ကိုယ့်အခြေအနေကို ကွက်ကွက်ကွင်းကွင်း မြင်တတ်ရန် အလွန်အရေးကြီးသည်။ 

ကိုယ့်အခြေအနေကို သိမြင်ပါက ဘုရားသခင် လက်ခံနိုင်ရန် ဘာလုပ်သင့်သနည်း။ ကျွန်ုပ်တို့၏ အခြေအနေသည် ဆိုးရွားနေသည့်အတွက် သေချာနားလည်ရန် လိုအပ်သည်။ ကျမ်းစာတွင် ဘုရားသခင်သည် မိမိ၌ တစ်ပါးတည်းသော သားတော်ကို စေလွှတ်ခဲ့ပြီး၊ လူသားအားလုံး၏ အပြစ်ကြွေးကို ဆပ်ပေးရန် ယေရှုခရစ်တော်သည် လက်ဝါးကပ်တိုင်ပေါ်တွင် ပေးဆပ်ခဲ့ပြီးဖြစ်သည်။ ထို့ကြောင့် သားတော်ကို ယုံကြည်သူသည် အပြစ်စီရင်ခြင်းကို မခံရဘဲ၊ မယုံကြည်သူသည် ယခုပင် အပြစ်စီရင်ခြင်းကို ခံရမည်ဟု ဖော်ပြထားသည်။ 

သို့သော် လောကလူသားများသည် အလင်းထက် မှောင်မိုက်ကို ပို၍ နှစ်သက်ကြသည်ဟု ကျမ်းစာက ဆိုထားသည်။ ယေရှုခရစ်တော်ကို ငြင်းပယ်သူများ များပြားစွာ ရှိနေသည်။ အဘယ်ကြောင့်ဆိုသော် သူတို့အတွက် ပြုလုပ်ပေးခဲ့သော အရာများကို လက်မခံကြသောကြောင့် ဖြစ်သည်။ ဤလောကတွင် လူများစွာ ရှိသည့်အထဲမှ ကျွန်ုပ်တို့သည် ယေရှုခရစ်တော် အခမဲ့ပေးအပ်ခဲ့သော ကယ်တင်ခြင်းဆုကျေးဇူးကို ထာဝရစွာ ငြင်းပယ်သူများ မဟုတ်ဘဲ၊ လက်ခံယုံကြည်သူများ ဖြစ်ကြရန် အရေးကြီးသည်။ ထိုသို့ဖြစ်မှသာ အပြစ်စီရင်ခြင်းမှ လွတ်ကင်း၍ အပြစ်လွှတ်ခြင်း အခွင့်ကို ရရှိကာ ခရစ်တော်နှင့်အတူ စိုးစံခွင့်ကို ရရှိမည် ဖြစ်သည်။ 

ဘုရားသခင်၏ ကြွလာခြင်းသည် လူတစ်မျိုးအတွက်သာ မဟုတ်ဘဲ၊ လူတိုင်းအတွက်၊ တစ်ကမ္ဘာလုံးအတွက် ဖြစ်သည်။ ယေရှုခရစ်တော်၏ ကယ်တင်ခြင်းဆုကျေးဇူးကို လက်ခံယုံကြည်ပါက ကယ်တင်ခြင်းကို ရရှိမည်ဖြစ်ပြီး၊ လက်မခံပါက အပယ်ခံရမည် ဖြစ်ကြောင်း ဤနှုတ်ကပတ်တော်အားဖြင့် ဝေမျှဟောပြောလိုက်ပါသည်။ ခရစ်တော်ကို မိမိစိတ်နှလုံးထဲတွင် လက်ခံယုံကြည်သူများ ဖြစ်ကြပါစေဟု ဆုတောင်းပါသည်။ 

ဆင်ခြင်နှလုံးသွင်းစရာ မေးခွန်းများ

1. သင့်ဘဝတွင် ယေရှုခရစ်တော်၏ ကယ်တင်ခြင်းကို လက်ခံယုံကြည်ရန် အဆင်သင့်ဖြစ်ပြီလား၊ သို့မဟုတ် မည်သည့်အရာများက သင့်ကို တွန့်ဆုတ်နေစေသနည်း။  

2. သင်၏ နေ့စဉ်ဘဝတွင် အလင်းကို ရွေးချယ်နေသလား၊ သို့မဟုတ် မှောင်မိုက်ဘက်သို့ ဦးတည်နေမိသလား—ဤရွေးချယ်မှုသည် သင့်ထာဝရဘဝအပေါ် မည်သို့ သက်ရောက်နိုင်မည်နည်း။

(ဆရာအာဗြံဟံ)