လူ၏ အသက်ဝိညာဉ်၏ တန်ဖိုး

“လူသည် ဤစကြဝဠာကို အကြွင်းမဲ့ အစိုးရ၍ မိမိ အသက်ဝိညာဉ် ရှုံးလျှင် အဘယ် ကျေးဇူးရှိသနည်း။ မိမိ အသက်ဝိညာဉ်ကို အဘယ် ဥစ္စာနှင့် ရွေးနိုင်သနည်း။” (မာကု ၈:၃၆-၃၇)

ရှေ့ဦးစွာ ဘုရားသခင်၏ နာမတော်ကို ချီးမွမ်းပါသည်။ ဘုရားသခင်၏ နှုတ်ကပတ်တော်အားဖြင့် အတူတကွ ဆင်ခြင်နိုင်ရန်၊ ကျွန်ုပ်တို့သည် လူသားများကို တန်ဖိုးရှိသော သူများအဖြစ် ဘုရားသခင်က ဖန်ဆင်း

ထားကြောင်း နားလည်ရသည်။ တန်ဖိုးရှိသည်ဟု ဆိုရာတွင်၊ အပြင်လူ (ခန္ဓာကိုယ်) နှင့် အတွင်းလူ (ဝိညာဉ်) ဟူ၍ ဆင်ခြင်ရန် အရေးကြီးသည်။ ကျမ်းစာက လူ၏ အတွင်းမှ ဝိညာဉ်သည် တန်ဖိုးရှိကြောင်း ဖော်ပြထားသည်။ လူ၏ ခန္ဓာကိုယ်ကို အပြင်ပန်းသဏ္ဍာန်အားဖြင့် မြင်တွေ့ရပြီး၊ လူများက ၎င်းကို အမျိုးမျိုး စီရင် သတ်မှတ်ကာ၊ မိမိကိုယ်မိမိ တန်ဖိုးရှိအောင် လုပ်ဆောင်နေကြသည်။ 

သို့သော် အတွင်းပိုင်း၌ တန်ဖိုးရှိသော ဝိညာဉ်ကို လူအများက သတိမထားမိကြပေ။ လူများစွာသည် ၎င်းတို့၏ အသက်ဝိညာဉ်၏ တန်ဖိုးကို နားမလည်ဘဲ အသက်ရှင်နေကြသည်ကို တွေ့ရသည်။ လူတို့က “တန်ဖိုးရှိသည်” ဟု ပြောသောအခါ၊ အပြင်ပန်းသဏ္ဍာန်ကို ကြည့်ပြီး “ကောင်းသည်” ဟု သတ်မှတ်ကြသည်။ လူ၏ အကျင့်ကောင်းလျှင် တန်ဖိုးရှိသည်၊ အကျင့်မကောင်းလျှင် တန်ဖိုးမရှိဟု ဆုံးဖြတ် သတ်မှတ်ကြသည်ကိုလည်း မြင်ရသည်။

သို့သော် လူ၏ အဓိက တန်ဖိုးသည် အတွင်းမှ ဘုရားသခင် ပေးထားသော ဝိညာဉ်တွင် ရှိသည်။ ဘုရားသခင်က လူကို ဖန်ဆင်းသောအခါ၊ အတွင်းမှ အသက်ဝိညာဉ်ကို မှုတ်သွင်းပေးခဲ့ကြောင်း တွေ့ရသည် (ကမ္ဘာဦး ၂:၇)။ ထိုဝိညာဉ်အားဖြင့် လူသည် ဘုရားသခင်၏ ရှေ့တော်မှာ တန်ဖိုးရှိသော သူများ ဖြစ်လာသည်။ လူ၏ ခန္ဓာကိုယ်သည် မြေမှုန့်ဖြင့် ဖန်ဆင်းခံရပြီး၊ တစ်နေ့ မြေမှုန့်သို့ ပြန်သွားမည် ဖြစ်သည် (ကမ္ဘာဦး ၃:၁၉)။ သေဆုံးသောအခါ ခန္ဓာကိုယ်သည် မြေကြီးထဲသို့ ပြန်သွားသော်လည်း၊ တန်ဖိုးရှိသော ဘုရားသခင် ပေးထားသည့် ဝိညာဉ်သည် ဆက်လက် ရှင်သန်နေမည် ဖြစ်သည်။

လူ၏ ဝိညာဉ်၏ အခြေအနေကို ပြန်ကြည့်သောအခါ၊ ၎င်းသည် ဆုံးရှုံး ပျက်စီးနိုင်ကြောင်း နားလည်ရသည်။ ဘုရားသခင်က လူကို ဖန်ဆင်းခဲ့စဉ်၊ ဝိညာဉ် ဆုံးရှုံး ပျက်စီးရန် အလိုတော် မရှိခဲ့ပါ။ ဘုရားသခင် ဖန်ဆင်းထားသော ဝိညာဉ်သည် ဆုံးရှုံး ပျက်စီးခြင်းသို့ မရောက်ဘဲ၊ ထာဝရ ကယ်တင်ခြင်း ရရှိရန် ဘုရားသခင်၏ အလိုတော်နှင့် ရည်ရွယ်ချက် ရှိသည်။ သို့သော် လူ၏ ဝိညာဉ်သည် ဘုရားသခင် ပေးထားသော ဝိညာဉ်ဖြစ်သော်လည်း၊ စာတန်၏ လွှမ်းမိုးမှုနှင့် ပိုင်ဆိုင်မှုကြောင့် တစ်နေ့ စာတန်နှင့်အတူ ပျက်စီး ဆုံးရှုံးသွားနိုင်သည်။

ကျွန်ုပ်တို့၏ အသက်တာတွင် ဝိညာဉ်သည် တန်ဖိုးရှိပြီး၊ ၎င်းကို ဆုံးရှုံး ပျက်စီးခြင်းမှ ကာကွယ်ရန် ကျမ်းစာက သွန်သင်ထားသည်။ ဘုရားသခင်က “မိမိ အသက်ဝိညာဉ်ကို အဘယ် ဥစ္စာနှင့်မျှ ရွေးနိုင်မည် မဟုတ်” ဟု ဖော်ပြထားသည် (မာကု ၈:၃၇)။ ၎င်းသည် အလွန် တန်ဖိုးကြီးမားသောကြောင့် မည်သည့် လောကီဥစ္စာဖြင့်မျှ ရွေးနှုတ်၍ မရပေ။ ထို့ကြောင့် ဆုံးရှုံးသွားမည့် လူ၏ အသက်ဝိညာဉ်များကို ဘုရားသခင်က ပြန်လည် ရွေးနှုတ် ကယ်တင်ရန်၊ လူသားအားလုံးအတွက် ပြင်ဆင်ပေးခဲ့ကြောင်း တွေ့ရသည်။ လူ၏ ဝိညာဉ်နှင့် ထိုက်တန်သော ပေးဆပ်မှုကို ဘုရားသခင်က လူသားအားလုံးအတွက် ပေးခဲ့ပြီး၊ ၎င်းသည် လောကသို့ ကြွဆင်းလာသော ယေရှုခရစ်တော်၏ အသွေးတော် ဖြစ်သည်။

သခင်ယေရှုသည် လူသားအားလုံးအတွက် ပေးဆပ်ရန်၊ လက်ဝါးကပ်တိုင်ပေါ်တွင် အသေခံခြင်းအားဖြင့် အသွေးသွန်းခဲ့ရသည်။ လူသည် အပြစ်မှ လွတ်မြောက်ရန် အသွေးသွန်းလောင်းဖို့ လိုအပ်ပြီး၊ “အသွေးမသွန်းလောင်းပဲ အပြစ်လွတ်ခြင်း မရှိ” (ဟေဗြဲ ၉:၂၂) ဟု ဖော်ပြထားသောကြောင့်၊ သခင်ယေရှုခရစ်တော်က အသေခံပြီး အသွေးတော်ကို သွန်းလောင်းပေးခဲ့သည်။ ထိုအသွေးတော်၏ တန်ဖိုးနှင့် ပေးဆပ်မှုအားဖြင့်၊ လူသားအားလုံးသည် အပြစ်မှ ရွေးနှုတ်ခြင်း ခံရပြီး၊ ဆုံးရှုံး ပျက်စီးခြင်း ငရဲသို့ မရောက်တော့ဘဲ၊ ထာဝရ ကယ်တင်ခြင်း၊ ဘုရားသခင်၏ လက်ခံခြင်းကို ခရစ်တော်၏ ရွေးနှုတ်ခြင်း၊ ကယ်တင်ခြင်း၊ အသွေးသွန်းခြင်း၊ အပြစ်လွှတ်ခြင်း အခွင့်အားဖြင့် ရရှိ ခံစားနိုင်သည်။

မိမိ အသက်ဝိညာဉ်ကို မည်သည့် ဥစ္စာနှင့်မျှ ရွေးနှုတ်၍ မရသည်ကို ကျမ်းစာက ဖော်ပြသည်။ လောကတွင် ဥစ္စာပစ္စည်း မည်မျှ ပိုင်ဆိုင်သည် ဖြစ်စေ၊ မည်မျှ ချမ်းသာ ကြွယ်ဝသည် ဖြစ်စေ၊ မိမိ အသက်ဝိညာဉ်ကို ဆုံးရှုံး ပျက်စီးရာ ငရဲမှ ရွေးနှုတ် ကယ်တင်နိုင်သော အရာ တစ်ခုမျှ မရှိပါ။ ကျွန်ုပ်တို့၏ တန်ဖိုးကြီးသော အသက်ဝိညာဉ်ကို ရွေးနှုတ် ကယ်တင်ရန်၊ တန်ဖိုးကြီးမားသော အရာကို ဘုရားသခင်က လူသားအားလုံးအတွက် ပေးခဲ့ပြီး၊ ၎င်းသည် ခရစ်တော်၏ အသွေးတော် ဖြစ်သည်။ ခရစ်တော်သည် လောကသို့ ကြွလာပြီး၊ လူသားအားလုံးအတွက် အသွေးသွန်းကာ ရွေးနှုတ် ကယ်တင်ခြင်း အမှုကို ပြီးမြောက်စေခဲ့သည်။

ထို့ကြောင့်၊ ယေရှုခရစ်တော်၏ ရွေးနှုတ်ခြင်း ကယ်တင်ခြင်း အမှုကို နှလုံးသွင်းပြီး ယုံကြည်ရန် အရေးကြီးသည်။ “ကျွန်ုပ်သည် ဘုရားသခင်၏ ရှေ့တော်မှာ အလွန် ဆိုးသော သူ ဖြစ်နေပါလား၊ ကျွန်ုပ်၏ ဝိညာဉ်သည် တန်ဖိုးရှိသော်လည်း၊ အပြစ်ကြောင့် တန်ဖိုးမဲ့သွားခဲ့ရပါလား” ဟု သိရှိပြီး၊ ထိုအပြစ်မှ ကယ်လွှတ်ရန် ယေရှုခရစ်တော် လောကသို့ ကြွလာခဲ့ကြောင်း နားလည်ရသည်။ ယေရှုခရစ်တော်ကို ယုံကြည် လက်ခံလျှင်၊ “ကျွန်ုပ်၏ အပြစ်များကို ယေရှုခရစ်တော်က လက်ဝါးကပ်တိုင်ပေါ်တွင် အသေခံပြီး၊ သွန်းတော်မူသော အသွေးတော်ဖြင့် ပေးဆပ်ခဲ့သည်” ဟု သိရှိကာ၊ ထိုရွေးနှုတ် ကယ်တင်သော ယေရှုခရစ်တော်ကို ကယ်တင်ပိုင်ရှင်၊ အရှင်သခင်အဖြစ် ယုံကြည် လက်ခံခြင်းအားဖြင့် အပြစ်ခွင့်လွှတ်ခြင်းကို ရရှိနိုင်သည်။ နှုတ်ကပတ်တော်က ဤအာမခံချက်ကို ပေးထားသည်။

မိမိကိုယ်မိမိ ဝါကြွားလို့ မရပါ။ လောကတွင် ကိုယ်ပိုင်ဆိုင်သော အရာများဖြင့်လည်း ဝါကြွား၍ မရပါ။ ကိုယ်ပိုင်ဆိုင်သမျှ အရာအားလုံးသည် တစ်နေ့ ထားခဲ့ရမည် ဖြစ်သည်။ ငွေရေးကြေးရေး၊ စည်းစိမ်ဥစ္စာ မည်မျှ ပေါများနေစေကာမူ၊ သေဆုံးသောအခါ ထိုအရာများကို ယူသွား၍ မရပါ။ ကျွန်ုပ်တို့ ယူသွားနိုင်သော အရာသည် ဘုရားသခင် ပေးထားသော အသက်ဝိညာဉ်သာ ဖြစ်ပြီး၊ ၎င်းကို ထာဝရ ကယ်တင်ခြင်းဖြင့် ယူဆောင်နိုင်ရန်၊ ဆုံးရှုံး ပျက်စီးခြင်းမှ ကာကွယ်ရန် ဘုရားသခင်၏ ရွေးနှုတ် ကယ်တင်ခြင်း အမှုဖြစ်သည်။ ဘုရားသခင်က ကျွန်ုပ်တို့အတွက် ပြုတော်မူသော အရာအားလုံးသည် အလွန် ဂုဏ်ယူ ဝမ်းမြောက်စရာ ကောင်းပြီး၊ ကျေးဇူးတင်စရာ ဖြစ်သည်။ ကျွန်ုပ်တို့ မလုပ်နိုင်သော အရာအားလုံးကို ဘုရားသခင်က လူသားအားလုံးအတွက် ပြီးမြောက်စေခဲ့သည်ကို နားလည် သိရှိရန် အရေးကြီးသည်။

 ဘုရားသခင် ပေးတော်မူသော အသက်ဝိညာဉ်ဖြင့် ပြည့်စုံစွာ ရှင်သန်လာရန်၊ ဆုံးရှုံးသွားသော ဝိညာဉ်ကို ပြန်လည် အသက်ရှင်လာစေရန်၊ ယေရှုခရစ်တော်က လောကသို့ ကြွလာပြီး အသက်တော်ကို ပေးခဲ့သည်။ အသက်အတွက် အသက်ကို ပေးခဲ့သော ယေရှုခရစ်တော်ကို ယုံကြည် လက်ခံခြင်းအားဖြင့်၊ ထာဝရ အသက်ကို ပိုင်ဆိုင် ရယူနိုင်ပြီး၊ ထာဝရကာလတွင် ဝမ်းမြောက်စွာ ဘုရားသခင်နှင့် အတူ နေထိုင် အသက်ရှင်ခွင့် ရမည် ဖြစ်သည်။ ဤသည်မှာ ဘုရားသခင်၏ ကျေးဇူးတရား၊ မေတ္တာတော်နှင့် ကယ်တင်ခြင်း ဆုကျေးဇူးဖြစ်ပြီး၊ လူတစ်ဦးစီတိုင်း ၎င်းကို ခံယူ ရရှိနိုင်ရန် ဘုရားသခင်၏ အလိုတော် ရှိကြောင်းကို နှုတ်ကပတ်တော်အားဖြင့် အတူတကွ ဆင်ခြင် ခွန်အားယူနိုင်ရန် အနည်းငယ် ခွန်အား ပေးလိုက်ပါသည်။ လူတိုင်း ဘုရားသခင်၏ ကောင်းကြီးမင်္ဂလာ ရပါစေ။

ဆင်ခြင်နှလုံးသွင်းစရာ မေးခွန်းများ  

1. သင်၏ အသက်ဝိညာဉ်၏ တန်ဖိုးကို သင် မည်မျှ သတိပြုမိပြီး၊ ၎င်းကို လောကီအရာများဖြင့် တိုင်းတာမိသည့် အခါမျိုး ရှိခဲ့ပါသလား၊ ထိုအခါ မည်သို့ ပြန်လည် ဆင်ခြင်ခဲ့သနည်း။  

2. ယေရှုခရစ်တော်၏ အသွေးတော်ဖြင့် ရွေးနှုတ် ကယ်တင်ခြင်းကို သင် မည်သို့ နေ့စဉ် ခံယူ အသက်ရှင်နေသနည်း၊ ၎င်းသည် သင့်ဘဝ၏ ဆုံးဖြတ်ချက်များကို မည်သို့ လွှမ်းမိုးပါသနည်း။

ဆရာအာဗြံဟံ