တန်ဖိုးရှိသော အသက်မည်ကဲ့သို့ ကယ်တင်ခြင်း ရရှိနိုင်မည်နည်း

      အားလုံးပဲ မင်္ဂလာပါ။ ယခုအချိန်တွင် လူတို့၏ အသက်ဝိညာဉ်သည် ကယ်တင်ခြင်း ရရှိရန် မည်မျှ အရေးကြီးသည်ကို အနည်းငယ် ဝေငှလိုပါသည်။ 

          ရှင်မာကုခရစ်ဝင် ၈:၃၆-၃၇ တွင် ဤသို့ ဆိုထားသည် - "လူသည် ဤစကြဝဠာကို အကြွင်းမဲ့ အစိုးရ၍ မိမိ အသက်ဝိညာဉ် ရှုံးလျှင် အဘယ်ကျေးဇူးရှိသနည်း။ မိမိ အသက်ဝိညာဉ်ကို အဘယ်ဥစ္စာနှင့် ရွေးနိုင်သနည်း။" ဤကျမ်းစာက လူတစ်ဦးသည် လောကတွင် မည်မျှပင် ချမ်းသာ

နေ၊ ကြွယ်ဝနေစေကာမူ၊ ဤစကြဝဠာတစ်ခုလုံးကို ပိုင်ဆိုင်နေသည်ပင် ဖြစ်စေ၊ မိမိ၏ အသက်ဝိညာဉ်သည် ငရဲသို့ ရောက်သွား၍ ပျက်စီး ဆုံးရှုံးသွားပါက၊ ၎င်းကို ပြန်ကယ်တင်ရန် မည်သည့်အရာနှင့်မျှ လဲလှယ်၍ မရနိုင်ကြောင်း ဖော်ပြထားသည်။ ထို့ကြောင့် လူ၏ အသက်ဝိညာဉ်သည် မည်မျှ တန်ဖိုးရှိပြီး အရေးကြီးသည်ကို ဤကျမ်းစာအားဖြင့် သိရှိနိုင်သည်။ 

လူ၌ ခန္ဓာ၊ စိတ်၊ ဝိညာဉ် သုံးပါးရှိပြီး၊ ထိုထဲမှ ဝိညာဉ်သည် ထာဝရဘုရားနှင့် အဆက်ပြတ်၍ ကင်းကွာနေသည်။ ထိုဝိညာဉ်ကို ဇာတိပကတိစိတ် ဟု ခေါ်သည်။ ဘုရားနှင့် ကင်းကွာနေသော လူသည် ဇာတိပကတိအတိုင်း တွေးခေါ်၊ ကြံစည်၊ လုပ်ဆောင်၍ အသက်ရှင်ကြသည်။ ရောမဩဝါဒစာ ၈:၆-၈ တွင် ဤသို့ ဆိုထားသည် - "ဇာတိပကတိ စိတ်သဘောသည် သေခြင်းအကြောင်းဖြစ်၏။ ဝိညာဉ်ပကတိ စိတ်သဘောသည် အသက်ရှင်ခြင်းအကြောင်းနှင့် ငြိမ်သက်ခြင်းအကြောင်း ဖြစ်၏။ အဘယ်ကြောင့်နည်းဟူမူကား၊ ဇာတိပကတိ စိတ်သဘောသည် ဘုရားသခင်နှင့် ဆန့်ကျင်ဘက် ဖြစ်၏။ ဘုရားသခင်၏ တရားတော်အလိုသို့ မလိုက်တတ်။ ထိုမျှမက မလိုက်နိုင်။ ထိုကြောင့် ဇာတိပကတိ၌ ကျင်လည်သော သူတို့သည် ဘုရားသခင်၏ စိတ်တော်နှင့် မတွေ့နိုင်ကြ။" 

ဤကျမ်းစာအားဖြင့် ဇာတိပကတိလူသည် ဇာတိအလိုကို လိုက်၍၊ ဇာတိပကတိအတိုင်းသာ အသက်ရှင်ကြောင်း တွေ့ရသည်။ ထိုဇာတိပကတိလူသည် ကောင်းမွန်သော အရာများကို မည်မျှပင် လုပ်ဆောင်စေကာမူ ဘုရားသခင်က လက်မခံ၊ နှစ်သက်တော်မမူကြောင်း သိရသည်။ ထို့ကြောင့် လူတစ်ဦးသည် ကယ်တင်ခြင်း ရရှိရန်ဆိုလျှင် အပြစ်စွဲနေသော ဝိညာဉ်သည် အပြစ်မှ ကင်းစင်မှသာလျှင် ကယ်တင်ခြင်း ရရှိမည် ဖြစ်သည်။ သို့သော် ဝိညာဉ် အပြစ်ကင်းစင်ရန် လူ့နည်း လူ့ဟန်ဖြင့် လုပ်ဆောင်၍ မရနိုင်သလို၊ ကုသိုလ်ကောင်းမှု၊ အကျင့်သီလများဖြင့်လည်း ရရှိ၍ မရနိုင်ကြောင်း သမ္မာကျမ်းစာက ဖော်ပြထားသည်။ 

ရှင်ယောဟန်ဩဝါဒစာ ပဌမစောင် ၁:၇ တွင် ဤသို့ ဆိုသည် - "ဘုရားသခင်သည် အလင်း၌ ရှိတော်မူသကဲ့သို့၊ ငါတို့သည် အလင်း၌ ကျင်လည်လျှင်၊ အချင်းချင်း မိဿဟာယ ဖွဲ့ခြင်း ရှိကြသည်ဖြစ်၍၊ ဘုရားသခင်၏ သားတော် ယေရှုခရစ်၏ အသွေးတော်သည် ငါတို့ အပြစ်ရှိသမျှကို ဆေးကြောတော်မူ၏။" ဤကျမ်းစာတွင် လူ၏ အပြစ်စွဲနေသော ဝိညာဉ်သည် ကယ်တင်ခြင်း ရရှိရန် ယေရှု၏ အသွေးအားဖြင့်သာ ဆေးကြောနိုင်သည်ဟု ဖော်ပြထားသည်။ ဥပမာအနေဖြင့် ရှိပ်စပီးယား၏ ပြဇာတ်တစ်ခုတွင် လူသတ်သမားတစ်ဦးသည် လူတစ်ဦးကို သတ်ပြီး၊ သွေးပေနေသော လက်နှင့် ဓားကို ရေဖြင့် ဆေးကြောလိုက်သည်။ ထို့နောက် "သွားစမ်းပါ၊ ဒီအပြစ်တွေ ငါ့မှာ မရှိတော့ဘူး" ဟု ကြွေးကြော်လိုက်သည်။ သို့သော် ထိုလူသတ်သမားသည် အပေါ်ယံသွေးကို ရေဖြင့် ဆေးကြောနိုင်သော်လည်း၊ လူသတ်ခဲ့သော အပြစ်ကို မည်သို့မျှ ဆေးကြောနိုင်မည် မဟုတ်ပါ။ 

ထိုနည်းတူပင် ကျွန်ုပ်တို့သည် မွေးကတည်းက ဗီဇအပြစ် ဆိုသည်မှာ ရှိပြီး၊ ထိုဗီဇအပြစ်ကြောင့်ပင် ဒုစရိုက်အပြစ်များကို ကျူးလွန်တတ်သည်။ လောကတွင် ကာယကံ၊ ဝစီကံ၊ မနောကံ ဟူသော ကံသုံးပါးဖြင့် အပြစ်ကို ကျူးလွန်၍ အသက်ရှင်ကြသည်။ ထိုအပြစ်များကို မည်သည့်နည်းဖြင့်မျှ ဆေးကြောနိုင်မည် မဟုတ်ပါ။ ဟေဗြဲဩဝါဒစာ ၉:၂၂ တွင် "ပညတ်တရားအတိုင်း ခပ်သိမ်းသော အရာတို့ကို ကုန်မတတ် အသွေးအားဖြင့် စင်ကြယ်စေတတ်၏။ အသွေးမသွန်းလောင်းဘဲ အပြစ်လွတ်ခြင်း မရှိ" ဟု ဖော်ပြထားသည်။ ထို့ကြောင့် ကျွန်ုပ်တို့ လူသားများ၏ အပြစ်များအတွက် သခင်ယေရှုခရစ်တော်၏ အသွေးဖြင့် ဆေးကြောသန့်စင်ခဲ့သည်။ တကယ်တမ်း ခံရမည့်သူများမှာ ကျွန်ုပ်တို့ လူသားများဖြစ်သော်လည်း၊ အပြစ်ရှိသော လူသားများအတွက် အပြစ်မဲ့သော ယေရှုက ကိုယ်စား ခံပေးခဲ့သည်။ 

သူ၏ အသွေးဖြင့် ဆေးကြောပြီးနောက် အသေခံ၍၊ သင်္ဂိုလ်ပြီး သုံးရက်မြောက်နေ့တွင် ရှင်ပြန်ထမြောက်ခဲ့သည်။ ထိုခရစ်တော်၏ ကယ်တင်ခြင်းအမှုကို စိတ်နှလုံးဖြင့် ယုံကြည်၍ လက်ခံမည်ဆိုပါက အပြစ်လွတ်ခြင်းကို ခံစားရမည် ဖြစ်သည်။ ဧဖက်ဩဝါဒစာ ၂:၈-၉ တွင် "ယုံကြည်သောအားဖြင့် ကျေးဇူးတော်ကြောင့် ကယ်တင်ခြင်းသို့ ရောက်ရ၏။ ကိုယ်အလိုအလျောက် ရောက်သည်မဟုတ်။ ဘုရားသခင် သနားတော်မူရာဖြစ်သတည်း။ ကိုယ်ကုသိုလ်ကြောင့် ကယ်တင်တော်မူခြင်းသို့ ရောက်သည်မဟုတ်။ သို့ဖြစ်၍ အဘယ်သူမျှ ဝါကြွားစရာ အခွင့်မရှိ" ဟု ဆိုထားသည်။ 

ချစ်သော မိတ်ဆွေ၊ သင်၏ ကယ်တင်ခြင်း စိတ်ချမှု ရှိပြီလား စစ်ဆေးရန် လိုအပ်ပါသည်။ အသက်ဝိညာဉ်သည် အလွန်တန်ဖိုးကြီးမားပါသည်။ ခရစ်တော်တစ်ပါးတည်းသာလျှင် ကောင်းကင်အောက်၊ မြေကြီးပေါ်တွင် အပြစ်မှ ကယ်တင်နိုင်သည်ဟု မိန့်တော်မူသည်။ ထို့ကြောင့် တန်ဖိုးရှိသော မိမိ၏ အသက်ဝိညာဉ် မဆုံးရှုံးရအောင် ခရစ်တော်ကို အချိန်မီ ယုံကြည်၍ လက်ခံရန် လိုကြောင်း ဝေငှ တိုက်တွန်းအပ်ပါသည်။ ဘုရားသခင် ကြားနာရသူတိုင်းအပေါ် ကောင်းကြီးပေးပါစေ။  

 ဆင်ခြင်နှလုံးသွင်းစရာ မေးခွန်းများ:

1. သင်၏ အသက်ဝိညာဉ် ကယ်တင်ခြင်း ရရှိရန် ယေရှုခရစ်၏ အသွေးကို ယုံကြည်၍ လက်ခံရန် အဆင်သင့် ဖြစ်ပြီလား၊ သို့မဟုတ် အဘယ်အရာက သင့်ကို တားဆီးနေသနည်း။  

2. လောက၏ ချမ်းသာကြွယ်ဝမှုကို ရှာဖွေနေမည့်အစား၊ သင်၏ အသက်ဝိညာဉ် ထာဝရ တည်မြဲရန် မည်သို့ ဦးစားပေးနိုင်မည်ထင်ပါသနည်း။

ဆရာလှစိုး