တမလွန်မှာ သွားရမည့်နေရာ

              အရှင်သော ဘုရား၏ နာမတော်ကို ချီးမွမ်းပါသည်။ အသက်ရှင်တော်မူသော ဘုရား၏ ဧဝံဂေလိ သတင်းစကားကို ဝေမျှခွင့်ပေးတော်မူသော ဘုရား၏ နာမဘုန်းကြီးပါစေ။  

          (၂ ကောရိန္သု ၄:၁၆-၁၈) တွင် "ထို့ကြောင့် ငါတို့သည် အားလျော့စိတ်ပျက်ခြင်းနှင့် ကင်းလွတ်ကြ၏။ ငါတို့၏ အပြင်လူသည် ဖောက်ပြန်ပျက်စီးခြင်းသို့ ရောက်သော်လည်း၊ အတွင်းလူမူကား တစ်နေ့ထက်တစ်နေ့ ပြုပြင်ခြင်းကို ခံရကြ၏။ အကြောင်းမူကား၊ မျက်မှောက်၌ ထင်ရှား

သော အရာတို့သည် ခဏသာ တည်၍၊ မထင်ရှားသော အရာတို့သည် အစဉ်အမြဲ တည်ကြောင်းကို ငါတို့သည် ထောက်လျှက်၊ ထင်ရှားသော အရာတို့ကို မကြည့်မှတ်ပဲ၊ မထင်ရှားသော အရာတို့ကို ကြည့်မှတ်ကြစဉ်၊ အခါယခု ခဏခံရ၍ ပေါ့ပါးသော ဆင်းရဲဒုက္ခသည် အတိုင်းထက်အလွန် ကြီးမြတ်လေးလံသော နိစ္စထာဝရ ဘုန်းအသရေကို ငါတို့အဖို့ ဖြစ်စေတတ်၏" ဟု ဖော်ပြထားသည်။  

ကျမ်းစာက မည်သို့ ဖော်ပြသနည်း။ "မျက်မှောက်၌ ထင်ရှားသော အရာတို့သည် ခဏသာ တည်၍၊ မထင်ရှားသော အရာတို့သည် အစဉ်အမြဲ တည်သည်" ဟု ဆိုထားသည်။ မှန်ပါသည်။ ယခု လက်ရှိ မျက်စိရှေ့တွင် တွေ့ရသော အိမ်တိုက်၊ ကား၊ တောင်တန်း၊ သစ်ပင် အစရှိသည် ရှိသမျှသည် မျက်စိနှင့် မြင်နိုင်သော အရာများဖြစ်သည်။ ဤအရာများသည် ထာဝရ မဟုတ်ဘဲ ကွယ်ပျောက်တတ်သည်။ ဤအထဲတွင် "လူ" ဆိုသော သတ္တဝါလည်း ပါဝင်သည်။ "နေ့မြင် ညပျောက်" ဆိုသော စကားပုံအတိုင်း၊ တစ်ခုခုကြောင့် နေ့တွင် မြင်ရပြီး ညဘက်တွင် သေဆုံးတတ်သည်။  

ထို့ကြောင့် မြင်ရသော အရာများသည် ခဏသာ တည်သည်ဟု ဖော်ပြထားသည်။ တစ်ဆက်တည်းမှာပင် မထင်ရှားသော အရာများသည် အစဉ်အမြဲ တည်သည်ဟု ဆိုထားသည်။ ထိုအရာများသည် အဘယ်အရာများလဲ။ ပိုးမွှားများကို မမြင်ရပါ။ ကောင်းကင်နိုင်ငံကို မမြင်ရပါ။ ဘုရားသခင်ကို မမြင်ရပါ။ သို့သော် ဤအရာများသည် အစဉ်အမြဲ တည်သည်ဟု ဖော်ပြထားသည်။ ဤအထဲတွင် လူ၏ အတွင်းထဲရှိ ဝိညာဉ်ကိုလည်း မမြင်ရပါ။ ထိုဝိညာဉ်သည်လည်း အစဉ်အမြဲ တည်သည်ဟု ဆိုထားသည်။ ထို့ကြောင့် "လူ" ဟု ပြောသောအခါ အပြင်လူနှင့် အတွင်းလူ ဆိုသည့် နှစ်မျိုး ရှိသည်။ 

အပြင်လူသည် ရုပ်ခန္ဓာဖြစ်ပြီး၊ မြေမှုန့်နှင့် ဘုရားဖန်ဆင်းထားသောကြောင့် အမြဲမတည်ပါ။ အသက် ၆၀၊ ၈၀၊ ၁၀၀ သို့ ရောက်သောအခါ ကွယ်ပျောက်သွားပြီး မရှိတော့ပါ။ သို့သော် အတွင်းလူသည် ပြုပြင်ခြင်း ခံရပြီး ပိုမိုကောင်းမွန်လာသည်ဟု ဆိုထားသည်။ ၎င်းသည် ဝိညာဉ်ကို ဆိုလိုခြင်းဖြစ်သည်။ ဘုရားသခင်က လူကို ဖန်ဆင်းသောအခါ နှာခေါင်းထဲသို့ ဇီဝအသက်ကို မှုတ်သွင်းလိုက်ရာ အသက်ရှင်သော သတ္တဝါ ဖြစ်လာသည်ဟု (ကမ္ဘာဦး ၂:၇) တွင် ဖော်ပြထားသည်။ ထို့ကြောင့် လောကတွင် တည်မြဲသော အရာနှင့် မတည်မြဲသော အရာတို့သည် တွဲနေပြီး၊ လူ၏ ခန္ဓာတစ်ခုတည်းတွင် ရှိနေသည်။ ထိုတွဲနေသော အရာများသည် ခွဲခွာရမည့် အချိန်လည်း ရှိသည်။  

(လုကာ ၁၆:၁၉-၃၁) ကို ကြည့်သောအခါ သူဌေးကြီးနှင့် ဆင်းရဲသား လာဇရု၏ အကြောင်းကို တွေ့ရသည်�। သူဌေးကြီးသည် နီမောင်းသော ကမ္ဗလာအင်္ကျီများ ဝတ်ဆင်ပြီး၊ လောကစည်းစိမ်များကို အခြွေအရံများနှင့် ခံစားနေသူဖြစ်သည်။ လာဇရုကမူ သူဌေးကြီး၏ စားကြွင်းစားကျန်များကို ကောက်စားနေရသူဖြစ်သည်။ တစ်နေ့တွင် ၎င်းတို့နှစ်ဦးစလုံး သေဆုံးသွားသောအခါ၊ ဆင်းရဲသား လာဇရုသည် ကောင်းကင်သို့ ရောက်သွားပြီး၊ သူဌေးကြီးကမူ အလွန်ပူပြင်းသော ငရဲထဲသို့ ကျသွားသည်ကို တွေ့ရသည်။ ထိုအခါ သူဌေးကြီးက လာဇရုကို အာဗြဟံ၏ ရင်ခွင်တွင် မြင်ပြီး နှစ်ခု တောင်းခဲ့သည်။ "ရေတစ်စက်လောက် ပေးပါ" ဟု တောင်းသော်လည်း ပေးလို့မရပါ။ "အလွန်နက်သော ချိုင့်ကြီး ခြားနေပြီ" ဟု ပြောသည်။ နောက်တစ်ခုမှာ "လောကတွင် ရှိသော ညီငါးယောက်ကို ကယ်တင်ခြင်း သွားပြောချင်သည်၊ သေသူက ရှင်ပြီး ပြောလျှင် ယုံကြမည်" ဟု တောင်းသော်လည်း မရပါ။ "သူတို့ကို ပြောမည့် ပရောဖက်များ၊ ဧဝံဂေလိဆရာများ ရှိသည်" ဟု ဖြေသည်။ ထို့ကြောင့် သေပြီးနောက် အခွင့်အရေး မရှိတော့ပါ။ နောင်တရလို့လည်း မရတော့ဘဲ၊ နှောင်းနောင်တသာ ဖြစ်သွားသည်။  

ထို့ကြောင့် တချို့သောသူများက "ဘယ်မှာလဲ၊ ဘုရားဘယ်မှာလဲ၊ ကောင်းကင်ပြ၊ မြင်မှ ယုံမယ်" ဟု ပြောတတ်ကြသည်။ မြင်မှသာ ယုံမည်ဆိုလျှင် မရပါ။ ဘုရားသခင်က မမြင်ရသော အရာကို ယုံခိုင်းခြင်းဖြစ်သည်�। ကောင်းကင်ကို မမြင်ရပါ။ ဘုရားသခင်ကို မမြင်ရပါ။ ငရဲကို မမြင်ရပါ။ ဝိညာဉ်ကို မမြင်ရပါ။ သို့သော် မမြင်ရသည်ကို ရှိသည်ဟု ဘုရားက ပြောလျှင် ယုံရမည်ဖြစ်သည်။ လေကိုလည်း မမြင်ရပါ။ သို့သော် လေရှိကြောင်းကို အပင်လှုပ်ခြင်း၊ အသက်ရှူခြင်းအားဖြင့် သိနိုင်သည်။ ထို့ကြောင့် မမြင်ရသော အရာများ ရှိသည်ဆိုတာကို မယုံလို့ မရပါ။  

ထို့ကြောင့် လောကတွင် ခဏသာ နေရသော ကျွန်ုပ်တို့ လူသားများ သေဆုံးသွားသောအခါ၊ မမြင်ရသော ကျွန်ုပ်တို့၏ ဝိညာဉ်သည် ကောင်းကင်သို့ ရောက်မည်လား၊ ငရဲသို့ သွားမည်လား။ အချိန်ရှိတုန်း ဆင်ခြင်ဖို့ လိုပါသည်၊ မိတ်ဆွေတို့။ ဘုရားသခင်ကမူ ကောင်းကင်သို့ ရောက်စေချင်သည်။ ယုံကြည်သောသူသာ ကောင်းကင်သို့ ရောက်သည်။ လာဇရုသည် ဘုရားရေးသားထားသော ကျမ်းစာကို ယုံကြည်သောကြောင့် ကောင်းကင်သို့ ရောက်ခဲ့သည်။  

ယေရှူခရစ်တော်သည် အပြစ်ရှိသော လူသားများအတွက် ကားတိုင်ပေါ်တွင် အသေခံခဲ့ပြီး၊ တတိယရက်မြောက်နေ့တွင် ရှင်ပြန်ထမြောက်ခဲ့သည်။ ထိုဘုရားသည် အပါယ်မှ နှုတ်ကာ ကောင်းကင်သို့ ပို့ပေးနိုင်သော အရှင်ဖြစ်သည်။ ထို့ကြောင့် ထိုဘုရားကို ယုံကြည်လျှင် ပူလောင်ပြင်းထန်သော အပါယ်သို့ မရောက်ဘဲ၊ အေးချမ်းသာယာသော ဘုရား၏ နိုင်ငံတော်သို့ ရောက်မည်ဖြစ်ကြောင်း ဤနှုတ်ကပတ်တော်အားဖြင့် ဝေမျှပေးလိုပါသည်။ အယောက်စီတိုင်းကို ဘုရားသခင်က ကောင်းကြီးပေးပါစေ။  

ဆင်ခြင်နှလုံးသွင်းစရာ မေးခွန်းများ:

1. သင့်ဘဝတွင် မမြင်ရသော အရာများကို ယုံကြည်ခြင်းသည် သင့်နေ့စဉ်ဘဝနှင့် တမလွန်အတွက် မည်သို့ အရေးပါသည်ဟု ထင်သနည်း။  

2. သင့်ဝိညာဉ်သည် တမလွန်တွင် ကောင်းကင်သို့ ရောက်ရန်၊ ယေရှူခရစ်တော်၏ ကယ်တင်ခြင်းကို ယုံကြည်လက်ခံရန် မည်သို့ ပြင်ဆင်နိုင်မည်နည်း။

ဆရာအောင်မြင့် - မြစ်ကြီးနား