ဘုရားကို မြည်းစမ်းကြည့်ပါ
အသက်ရှင်တော်မူသော ဘုရားသခင်၏ နှုတ်ကပတ်တော်ကို ဝေမျှခွင့်ရသည့်အတွက် ကျေးဇူးတော်ကို ချီးမွမ်းပါသည်။ ကျမ်းစာတစ်ပိုဒ်ကို ဖတ်ရှုလိုပါသည်။ (ဆာလံ ၃၄:၈) တွင် "ထာဝရဘုရားသည် ကောင်းမြတ်တော်မူသည် အကြောင်းကို မြည်းစမ်း၍ သိမှတ်ကြလော့။ ကိုယ်တော်ကို ခိုလှုံသောသူသည် မင်္ဂလာရှိ၏" ဟု ဖော်ပြထားသည်။
ဤနှုတ်ကပတ်တော်အားဖြင့် "ထာဝရဘုရားကို မြည်း
စမ်းပါ" ဆိုသော ခေါင်းစဉ်ဖြင့် ဝေမျှလိုပါသည်။ လူတိုင်းလူတိုင်းသည် ကိုယ်လိုချင်သော အရာ၊ ဝယ်ယူမည့် အရာကို မြည်းစမ်းလေ့ရှိကြသည်။ မြည်းစမ်းပြီးမှ ကိုယ်လိုချင်သော အရာကို ဝယ်ယူလေ့ရှိကြသည်။ ထိုနည်းတူ၊ လောကတွင် အသက်ရှင်သောအခါ "ဘုရား" ဆိုသော အရာကို တကယ်ရှိသလား၊ မရှိသလားဆိုတာကို မြည်းစမ်းဖို့ လိုအပ်သည်။လောကတွင် ဘုရားများ အများကြီး ရှိပါသည်။ ကမ္ဘာပေါ်တွင် နတ်ဘုရားပေါင်း မြောက်များစွာကို ကိုးကွယ်ကြသည်။ နတ်ဘုရားပေါင်း ၃၀၀၀ ကျော် ရှိသည်ဟုလည်း ကြားဖူးပါသည်။ ဤဘုရားများ အများကြီးထဲတွင် မည်သည့်ဘုရားက မှန်ကန်သနည်းဆိုတာကို မြည်းစမ်းဖို့ လိုအပ်သည်။
စောစောက ဖတ်ခဲ့သော ကျမ်းချက်တွင် "ထာဝရဘုရားသည် ကောင်းမြတ်တော်မူသည် အကြောင်းကို မြည်းစမ်း၍ သိမှတ်ကြလော့" ဟု ပြောထားသည်။ (ဓမ္မရာဇဝင် တတိယစောင် ၁၈:၂၁-၃၉) ကို ကြည့်သောအခါ၊ ဧလိယ ဆိုသော ပရောဖက်တစ်ပါးက ဣသရေလ ဂျူးလူမျိုးများကို မေးစမ်းခဲ့သည်။ "ဧလိယသည် လူများရှိရာသို့ လာ၍ ‘သင်တို့သည် ဘာသာနှစ်ပါးစပ်ကြားမှာ အဘယ်မျှကာလပတ်လုံး ယုံမှားသောစိတ်နှင့် နေကြလိမ့်မည်နည်း။ ထာဝရဘုရားသည် ဘုရားသခင်မှန်လျှင် ထိုဘုရားကို ဆည်းကပ်ကြလော့။ ဗာလသည် ဘုရားသခင်မှန်လျှင် ထိုဘုရားကို ဆည်းကပ်ကြလော့’ ဟု ဆိုလျှင်၊ လူများတို့သည် တိတ်ဆိတ်စွာ နေကြ၏" ဟု ဖော်ပြထားသည်။
ဧလိယက ဂျူးလူမျိုးများကို "မည်သည့်ဘုရားက မှန်ကန်သနည်း" ဆိုတာကို မြည်းစမ်းဖို့ လိုသည်ဟု ပြောသည်။ ထို့ကြောင့် ဗာလရုပ်တု ကိုးကွယ်သူများကို ဧလိယက ဦးစွာ "ကောင်းကင်မှ မီးအားဖြင့် ထူးသော ဘုရားသည် ဘုရားစစ်၊ ဘုရားမှန် ဖြစ်လိမ့်မည်။ သင်တို့ ခေါ်ကြပါ၊ ကောင်းကင်ကို တောင်းဆိုကြပါ၊ မီးကျလာဖို့ အခွင့်ရှိသည်" ဟု ပြောလိုက်သည်။
ထိုအချိန်တွင် ဗာလရုပ်တု ကိုးကွယ်သူများက ယဇ်ပလ္လင်ကို တည်ဆောက်ကြသည်။ သူတို့ ကိုးကွယ်သော ဘုရားများကို "ကောင်းကင်မှ မီးကျလာပြီး လောင်ပါစေ" ဟု ဆုတောင်းကြသည်။ တစ်နေ့လုံး ဆုတောင်းသော်လည်း မီးမကျလာပါ။ ထို့ကြောင့် ဧလိယက "မင်းတို့ဘုရားက မကြားဘူးထင်တယ်။ သူ အလုပ်များနေသလား။ အချိန်တော့ ကုန်သွားပြီ။ ယခု ငါ့ရဲ့ ထာဝရဘုရားသခင်ကို ခေါ်မည့် အလှည့်ရောက်ပြီ" ဟု ပြောလိုက်သည်။
ဧလိယသည် ကျောက် ၁၂ လုံးကို ယူကာ၊ ယဇ်ပလ္လင်၏ ဘေးပတ်လည်တွင် ကျုံးတူးပြီး ရေအပြည့်ထည့်ထားလိုက်သည်။ ထင်းကို ယူပြီး၊ နွားကို အပိုင်းပိုင်းဖြတ်ကာ ထားသည်။ ရေများဖြင့် စိုနအောင် လောင်းထားသည်။ ထို့နောက် "အသက်ရှင်သော ထာဝရဘုရား၊ သင်ဟာ ရှိတယ်ဆိုလျှင် ကောင်းကင်မှ မီးကျလာပြီး ထူးတော်မူပါ" ဟု ဆုတောင်းလိုက်သည်။ ထိုအချိန်တွင် ကောင်းကင်မှ မီးကျလာပြီး၊ ထင်းရော၊ ယဇ်ကောင်ရော လောင်ကျွမ်းသွားကာ၊ အသက်ရှင်သော ဘုရားရှိကြောင်း၊ ထာဝရဘုရားက ဖော်ပြလိုက်သည်။ ထိုအချိန်တွင် ဣသရေလ ဂျူးလူမျိုးများသည် အသက်ရှင်သော ဘုရားကို ခေါ်သောအခါ၊ မီးအားဖြင့် ထူးသော ဘုရားဖြစ်ကြောင်း သိသွားကြသည်။
ယနေ့ ကမ္ဘာကြီးတွင်လည်း မြောက်များစွာသော ဘုရားများ ရှိကြသည်။ မည်သည့်ဘုရားက အသက်ရှင်သော ဘုရားဖြစ်သနည်း၊ စစ်မှန်သော ဘုရားဖြစ်သနည်းဆိုတာကို မြည်းစမ်းဖို့ အလွန်အရေးကြီးသည်။ (ယေရမိ ၃၃:၃) တွင် "ငါ့ကို ခေါ်လော့။ ငါ ထူးမည်။ ကြီးသောအရာ၊ သင်မသိနိုင်အောင် နက်နဲသော အရာတို့ကို ငါ ပြမည်" ဟု ဖော်ပြထားသည်။ အသက်တာထဲတွင် အခက်အခဲ၊ ပြဿနာများနှင့် တွေ့သည်ဖြစ်စေ၊ အနာရောဂါများ ခံစားရသည်ဖြစ်စေ၊ ထိုဘုရားကို ဆုတောင်းကြည့်ပါ၊ မြည်းစမ်းကြည့်ပါ။
(ယာကုပ် ၅:၁၃) တွင် "သင်တို့တွင် ဆင်းရဲခံရသောသူ ရှိလျှင် ဆုတောင်းစေ။ ရွှင်လန်းသောသူ ရှိလျှင် ဆာလံသီချင်းကို ဆိုစေ" ဟု ဖော်ပြထားသည်။ ထို့ကြောင့် ဘဝအသက်တာထဲတွင် အခက်အခဲ၊ ပြဿနာများ၊ ဖော်ပြလို့မရနိုင်သော ဒုက္ခများနှင့် ကြုံတွေ့ရသောအခါ၊ ထိုဘုရားကို ခေါ်ကြည့်လိုက်ပါ၊ ယေရှူခရစ်တော် ဘုရားကို မြည်းစမ်းကြည့်လိုက်ပါ။
သေခြင်းကို အောင်မြင်သော ခရစ်တော် ဘုရားသည် အသက်ရှင်သော ဘုရားဖြစ်ကြောင်း စိတ်နှလုံးထဲတွင် ယုံကြည်လက်ခံဖို့ လိုအပ်သည်။ အသက်ရှင်သော ဘုရားကို မြည်းစမ်းကြည့်ဖို့ လိုအပ်ကြောင်း ဤနှုတ်ကပတ်တော်လေးနှင့် ဝေမျှလိုက်ပါသည်။ ဘုရားသခင်က အားလုံးအပေါ် ကောင်းကြီးပေးပါစေ။
ဆင်ခြင်နှလုံးသွင်းစရာ မေးခွန်းများ:
1. သင့်ဘဝတွင် အခက်အခဲ သို့မဟုတ် ပြဿနာများ ကြုံတွေ့ရသောအခါ၊ ယေရှူခရစ်တော်ကို မြည်းစမ်းကြည့်ရန် မည်သို့ ဆုတောင်းပြီး ယုံကြည်မှုထားနိုင်မည်နည်း။
2. အသက်ရှင်သော ဘုရားကို မြည်းစမ်းကြည့်ခြင်းသည် သင့်ဘဝတွင် မည်သည့် ပြောင်းလဲမှုများ သို့မဟုတ် မင်္ဂလာများကို ဖြစ်ပေါ်စေနိုင်သည်ဟု ထင်သနည်း။
ဆရာအောင်မြင့် - မြစ်ကြီးနား
Comments
Post a Comment