ကောင်းကင်နိုင်ငံသို့ ဝင်ရောက်ခြင်း

        “ကုလားအုပ်သည် အပ်နဖားကို လျှိုလွယ်၏။ ငွေရတတ်သောသူသည် ဘုရားသခင်၏ နိုင်ငံတော်ထဲသို့ ဝင်ခဲသည်” ဟု မိန့်တော်မူ၏။ (လုကာ ၁၈:၂၅)

       ရှေ့ဦးစွာ ဘုရားသခင်ကို ချီးမွမ်းပါသည်။ အသက်ရှင်တော်မူသော ဘုရားသခင်၏ နှုတ်ကပတ်တော်ကို ဆင်ခြင်နိုင်ရန်၊ ရှင်လုကာ ခရစ်ဝင် ၁၈:၂၅ ကို ဖတ်ပြီး အတူတကွ ဆင်ခြင်ဖို့ ဝေမျှလိုပါသည်။

         ဤနှုတ်ကပတ်တော်တွင် အရာရှိတစ်ဦး၏ အကြောင်းကို ဦးစွာ ပြောပြ

လိုပါသည်။ အရာရှိတစ်ဦးသည် သခင်ယေရှုထံသို့ လာပြီး “ထာဝရ အသက်ကို ရရှိဖို့ အဘယ်သို့ ပြုရပါမည်နည်း” ဟု မေးခဲ့သည်။ သူသည် သခင်ယေရှုက ထာဝရ အသက်ကို ပေးနိုင်ကြောင်း သိထားပြီး၊ မိမိ ပိုင်ဆိုင်သော ဥစ္စာပစ္စည်းများထက် ထာဝရ အသက်က ပို၍ အရေးကြီးသည်ဟု ခံစားရသူ ဖြစ်သည်။ သခင်ယေရှုထံ လာမေးသောအခါ၊ သခင်ယေရှုက “မင်း ပညတ်တော်ကို သိသည် မဟုတ်လား” ဟု မေးလိုက်သည်။

 အရာရှိက “ထိုပညတ်ရှိသမျှကို ငယ်သော အရွယ်မှစ၍ အကျွန်ုပ် လိုက်လျှောက်ခဲ့ပါသည်” ဟု ဖြေသည်။ သခင်ယေရှုက ထပ်ပြီး “မင်းမှာ တစ်ခု လိုသေးသည်။ မင်းမှာ ရှိသမျှ ဥစ္စာတွေကို ရောင်းပြီး ဆင်းရဲသောသူများကို ပေးကမ်းလျှင်၊ ကောင်းကင်ဘုံမှာ ဘဏ္ဍာ ရလိမ့်မည်။ ပြီးမှ ငါ့နောက်သို့ လိုက်လော့” ဟု မိန့်တော်မူသည်။

အရာရှိသည် ထာဝရ အသက်ကို ရချင်သောကြောင့် သခင်ယေရှုထံ လာပြီး နည်းလမ်းများကို တောင်းခံခဲ့သည်။ သို့သော် “တစ်ခု လိုသေးသည်” ဟု သခင်ယေရှု ပြောသော အဖြေကို ကြားသောအခါ၊ သူသည် ဥစ္စာ များစွာ ရတတ်သော သူဖြစ်သဖြင့် စိတ်မကောင်းစွာ လှည့်ပြန် သွားခဲ့သည်။ သခင်ယေရှုက “ကုလားအုပ်သည် အပ်နဖားကို လျှိုလွယ်၏။ ငွေရတတ်သောသူသည် ဘုရားသခင်၏ နိုင်ငံတော်ထဲသို့ ဝင်ခဲသည်” ဟု ပရိသတ်ရှေ့တွင် လူတို့၏ အခြေအနေကို ချပြခဲ့သည်။ လူများသည် ၎င်းတို့၏ ဥစ္စာကို စွန့်ပြီး သခင်ယေရှုနောက်သို့ လိုက်ရန် မစွမ်းနိုင်ကြောင်း တွေ့ရသည်။ ဘုရားသခင်၏ အမြင်အရ၊ မိမိ၏ ဥစ္စာပစ္စည်းများကို စွန့်လွှတ်နိုင်မှ ဘုရားနောက်သို့ လိုက်နိုင်ပြီး၊ ထာဝရ အသက်ကို ရရှိနိုင်မည် ဖြစ်သည်။

ထာဝရ အသက်ဆိုသည်မှာ ဥစ္စာပစ္စည်းများဖြင့် ရွေးယူ၍ မရနိုင်ပါ။ မိမိ၏ ထာဝရ အသက်အတွက် မည်သည့်အရာနှင့်မှ ပေးဆပ်၍ မရနိုင်ပါ။ မိမိ ဥစ္စာပစ္စည်းကို ခင်တွယ် စွဲလမ်းနေလျှင် ထာဝရ အသက်နှင့် ဝေးကွာသွားမည် ဖြစ်သည်။ ထို့ကြောင့် ထာဝရ အသက်ကို ဘုရားသခင် ပေးသော နည်းလမ်းဖြင့်သာ ရယူနိုင်ကြောင်း သိရသည်။ သခင်ယေရှုက ၎င်း၏ နည်းလမ်းကို ညွှန်ပြပေးခဲ့ပြီး ဖြစ်သည်။

ချမ်းသာ ကြွယ်ဝသော သူအတွက် ခရစ်တော်ကို လက်ခံရန် ခက်ခဲမည် ဖြစ်သည်။ အကြောင်းမှာ လောက၏ လုံလောက် ပြည့်ဝမှု၊ ပိုင်ဆိုင်မှုများကို အားကိုးပြီး နေထိုင်နေသောကြောင့်၊ နောင်တမလွန်အရေးကို စဉ်းစား၊ ဆင်ခြင်မည် မဟုတ်ပေ။ ငွေကို ပိုင်ဆိုင်လာသောအခါ၊ လူများစွာသည် အခြားအရာများကို ဂရုမစိုက်၊ စိတ်မဝင်စားတော့ဘဲ၊ ဘုရားသခင်ကိုလည်း စိတ်မဝင်စား၊ မကိုးစားတော့ကြောင်း တွေ့ရသည်။ “ငွေရတတ်သော သူသည် ဘုရားသခင်၏ နိုင်ငံတော်ထဲသို့ ဝင်ခဲသည်” ဟု သခင်ယေရှုက မိန့်တော်မူခဲ့သည်။ သို့သော် ငွေမရတတ်၊ ဆင်းရဲသော သူများပင် ဘုရားသခင်ကို မရှာဘဲ အသက်ရှင်နေလျှင်၊ ထာဝရ အသက်နှင့် ဝေးကွာမည် ဖြစ်သည်။

ဤစကားကို လူတို့ကြားသောအခါ “ဒါဆိုရင် ဘယ်လို ကောင်းကင်နိုင်ငံကို ဝင်နိုင်မှာလဲ” ဟု တွေးကြပြီး၊ အလွန် ခက်ခဲမည်ဟု ထင်ကြသည်။ သို့သော် လူတို့ မတတ်နိုင်သော အရာကို ဘုရားသခင်က တတ်နိုင်ကြောင်း ဤနေရာတွင် တွေ့ရသည် (လုကာ ၁၈:၂၇)။ ဘုရားသခင်သည် လူတိုင်းအား စိတ်ချရသော အာမခံချက် ပေးလိုပြီး၊ ကောင်းကင်နိုင်ငံသို့ ရောက်စေလိုသည်။ လူသားအားလုံးအတွက် ဘုရားသခင်က ပြင်ဆင်ထားပြီး၊ သခင်ယေရှု ကြွလာခြင်းဖြင့် ကောင်းကင်နိုင်ငံသို့ လွယ်ကူစွာ ရောက်ရှိနိုင်မည် ဖြစ်သည်။

ထို့ကြောင့်၊ သခင်ယေရှုခရစ်တော်ကို ယုံကြည် လက်ခံမည်ဆိုလျှင်၊ ကောင်းကင်နိုင်ငံ ဝင်ခွင့်အတွက် လွယ်ကူသွားမည် ဖြစ်သည်။ မိမိ၏ ဘဝအသက်တာကို ဘုရားသခင်ထံ အပ်နှံတတ်သော သူဖြစ်မည်ဆိုလျှင်၊ ထာဝရ အသက်ကို ရရှိမည်ဟူသော အကြောင်းကို ဤနှုတ်ကပတ်တော်အားဖြင့် ဝေမျှလိုက်ပါသည်။ လူအားလုံးကို ဘုရားသခင်၏ ကောင်းကြီးမင်္ဂလာ ရပါစေ။

 ဆင်ခြင်နှလုံးသွင်းစရာ မေးခွန်းများ  

1. သင်၏ နေ့စဉ်ဘဝတွင် ဥစ္စာပစ္စည်း သို့မဟုတ် လောကီအရာများကို စွဲလမ်းနေမိသည့် အခါများ ရှိပါသလား၊ ၎င်းတို့ကို စွန့်လွှတ်၍ သခင်ယေရှုနောက်သို့ လိုက်ရန် သင် မည်သို့ ပြင်ဆင်နိုင်မည်နည်း။  

2. သခင်ယေရှုက “လူတို့ မတတ်နိုင်သော အရာကို ဘုရားသခင်က တတ်နိုင်သည်” ဟု မိန့်တော်မူသည်ကို သင်၏ ဘဝတွင် မည်သို့ အားကိုးယုံကြည်ထားသနည်း၊ ၎င်းသည် သင့်ကို ကောင်းကင်နိုင်ငံသို့ ရောက်ရန် မည်သို့ ခွန်အား ဖြစ်စေသနည်း။

ဆရာအာဗြံဟံ