ခရစ္စမတ်အဓိပ္ပါယ်နှင့်အနှစ်သာရ

           စာဖတ်သူ မိတ်ဆွေ—     ချမ်းမြေ့ပါစေကြောင်း ဆုမွန်ကောင်း တောင်းလျက် မေတ္တာပို့သလိုက်ပါသည်။  အေးမြသာယာ (Sweet December) ခရစ္စမတ် ချိန်ခါသမယတွင် မိတ်ဆွေအား ထာဝရမေတ္တာဖြင့် ချစ်တော်မူသော ပုဂ္ဂိုလ်တစ်ဦးနှင့် မိတ်ဆွေပေးလိုပါသည်။ ထိုပုဂ္ဂိုလ်သည် မိတ်ဆွေ၏ ထိုင်ခြင်း၊ ထခြင်း အရာရာတို့ကို သိတော်မူ၏။ မိတ်ဆွေ၏ အကြံအစည်များကို အဝေးမှပင် နားလည်တော်မူ၏။ မိတ်ဆွေ၏ သွားရာလမ်းကို၎င်း၊ အိပ်ယာကိုလည်း၎င်း စစ်ဆေး၍ မိတ်ဆွေ၏ ကျင့်သော အကျင့်

အလုံးစုံကို အကြွင်းမဲ့ သိတော်မူ၏။ ထို့ကြောင့် မိတ်ဆွေ၏ အားနည်းချက်၊ ဒုက္ခပြဿနာများကို ဖြေရှင်းပေးရန် ဤလောကသို့ ကြွလာခဲ့ခြင်း ဖြစ်ပါသည်။  

သို့သော် ကျွန်ုပ်တို့၏ လောဘ၊ ဒေါသ၊ မောဟ တည်းဟူသော ဒုစရိုက်အမှောင်ထုဖြင့် ဖုံးလွှမ်းနေသောကြောင့်၊ ထိုပုဂ္ဂိုလ်နှင့် ကျွန်ုပ်တို့ မတွေ့နိုင်ခြင်း ဖြစ်ပါသည်။ အဘယ်ကြောင့်ဆိုသော် ကျွန်ုပ်တို့၌ အပြစ်တရား ရှိနေသောကြောင့် ဖြစ်ပါသည်။  

#### အပြစ်တရား

“အနာသိလျှင် ဆေးရှိသည်” ဟူသော မြန်မာဆိုရိုးစကား ရှိခဲ့ပါသည်။ သို့ရာတွင် အနာသိသော်လည်း ဆေးမရှိသော (AIDS) ရောဂါအကြောင်းကို မိတ်ဆွေလည်း သိပြီး ဖြစ်ပါလိမ့်မည်။ ယနေ့ ကမ္ဘာပေါ်တွင် ကြောက်စရာ အကောင်းဆုံးသော ရောဂါမှာ (AIDS) ရောဂါပင် ဖြစ်ပါသည်။ ၎င်းရောဂါပိုး၏ ကူးစက်ပြန့်ပွားခြင်းကို လူသားများ တွေ့ရှိကြသော်လည်း၊ ကုစရာဆေး မရှိ၊ မျှော်လင့်ချက် မရှိ၊ ထိုရောဂါဝေဒနာရှင်များအတွက် ဧကန်အမှန် သေရမည်ဟုသာ သိရှိရပါသည်။ (AIDS) ရောဂါဝေဒနာရှင်၏ ကိုယ်မှထွက်သော အရည်များ၊ မျက်ရည်များ၊ နို့ရည်များ၊ သွေးသွန်းခြင်း၊ ကိုယ်ဝန်ဆောင် မိခင်မှတဆင့် အပြစ်မဲ့သော ရင်သွေးငယ်သို့၎င်း၊ အခြားသူများထံသို့၎င်း ကူးစက်နိုင်သည်ဟု သိရပါသည်။  

ချစ်သောမိတ်ဆွေ၊ (AIDS) ရောဂါထက် ကြောက်မက်ဖွယ်ကောင်းသော ရောဂါတစ်ခု မိတ်ဆွေ၏ အထဲ၌ ရှိနေကြောင်း သိပါသလား။ (AIDS) ရောဂါသည် လူ၏ ခန္ဓာကိုယ်ကိုသာ ဖျက်ဆီးနိုင်သည်။ ကျွန်ုပ်တို့၏ နာမ်ဝိညာဉ်ကိုမူ ဖျက်ဆီးနိုင်ခြင်း မရှိပါ။ သို့သော် မိတ်ဆွေ အထဲရှိနေသော ထိုရောဂါသည် မိတ်ဆွေ၏ ခန္ဓာ၊ စိတ်၊ ဝိညာဉ် သုံးပါးစလုံးကို ထာဝရ ငရဲမီး၌ ဖျက်ဆီးနိုင်ပါသည်။ ထိုရောဂါမှာ မွေးကတည်းက ပါလာသော အပြစ်တရားပင် ဖြစ်ပါသည်။ ကျမ်းစာလာသည်မှာ “အကျွန်ုပ်သည် မွေးစကပင် အပြစ်ပါလျက် ရှိပါ၏။ အမိဝမ်းထဲမှာ ပဋိသန္ဓေယူစဉ်တွင် အပြစ်စွဲပါ၏” (ဆာလံ ၅၁:၅)။  

ဤအပြစ်သည် ကာယကံ၊ ဝစီကံ၊ မနောကံ စသည့် ကံသုံးပါးအားဖြင့် ကျူးလွန်သော ဒုစရိုက်မဟုတ်ပဲ၊ မိဘ၊ ဘိုးဘွား၊ ဘီဘင်မှ ဆင်းသက်လာသော မွေးရာပါ အပြစ်ဖြစ်ပါသည်။ (AIDS) ရောဂါပိုးများ ပါလာသကဲ့သို့၊ ကျွန်ုပ်တို့သည်လည်း ဘာအပြစ်မျှ မကျူးလွန်ပဲ၊ မိဘများ၏ အပြစ်ကြောင့် အပြစ်သားများ ဖြစ်လာရပါသည်။ ဤသို့ ဖြစ်လာရခြင်း အကြောင်းမှာ “ငခုံးမတစ်ကောင်ကြောင့် တစ်လှေလုံး ပုပ်သည်” ဟူသော စကားပုံနှင့်အညီ၊ အပြစ်တရားသည် တစ်ယောက်သောသူ အာဒံအားဖြင့် ဤလောကသို့ ဝင်၍၊ အပြစ်တရားအားဖြင့် သေခြင်းတရား ဝင်လာသည်နှင့်အညီ၊ လူအပေါင်းတို့သည် အပြစ်ရှိသောကြောင့် သေခြင်းသို့ ရောက်ရကြ၏ (ရောမ ၅:၁၂)။  

#### လူ၏ မွေးရာပါ အပြစ်သဘော

ချစ်သောမိတ်ဆွေ၊ မြန်မာစကားပုံ၌ “သစ်ပင်မှန်လျှင် အမြစ်ရှိ၏၊ လူမှန်လျှင် အချစ်ရှိ၏” ဟူသော စကားကို ကြားဖူးပေလိမ့်မည်။ ဤစကားကို ကျွန်ုပ်တို့ ထပ်ဖြည့်လိုသည်မှာ “လူမှန်လျှင် အပြစ်ရှိ၏” ဟူ၍ ဖြစ်ပါသည်။ ဥပမာ—ကြက်ဖသည် တွန်သောကြောင့် ကြက်ဖဖြစ်ခြင်း မဟုတ်ပဲ၊ ကြက်ဖဖြစ်နေသောကြောင့် တွန်နေခြင်းသာ ဖြစ်သည်။ ထို့အတူ လူသည် အပြစ်လုပ်သောကြောင့် အပြစ်သား ဖြစ်ရခြင်း မဟုတ်၊ အပြစ်သား ဖြစ်သောကြောင့် အပြစ်လုပ်နေခြင်း ဖြစ်ပါသည်။ ကြက်ဖ တွန်သည်ဖြစ်စေ၊ မတွန်သည်ဖြစ်စေ၊ ကြက်ဖသာ ဖြစ်သည်။ ထို့အတူ လူသည် အပြစ်လုပ်သည်ဖြစ်စေ၊ မလုပ်သည်ဖြစ်စေ၊ အပြစ်သားသာ ဖြစ်သည်။  

ကျမ်းစာလာသည်ကား “လူအပေါင်းတို့သည် အပြစ်ရှိသောကြောင့် သေခြင်းသို့ ရောက်ရကြ၏” (ရောမ ၅:၁၂)။ ထို့ကြောင့် လူတို့သည် ကိုယ့်အပြစ်ကို ဖုံးမရနိုင်ရာ (ရောမ ၁:၂၀)။ “အပြစ်တရား၏ အခကားသည် သေခြင်းပေတည်း” (ရောမ ၆:၂၃) ဟူသော ကျမ်းချက်နှင့်အညီ၊ အပြစ်ရှိသော ကျွန်ုပ်တို့၏ လမ်းဆုံးသည် အိုနာသေသောအခါ၊ ခန္ဓာကိုယ်သည် မြေမှုန့်မှ လာသောကြောင့် မြေမှုန့်သို့ ပြန်သွားရသော်လည်း၊ အပြစ်ရှိသော နာမ်ဝိညာဉ်မှာ အပါယ်ငရဲသို့ ဧကန်အမှန် လားရမည် ဖြစ်ပါသည်။ ထို့ကြောင့် အပြစ်ရောဂါသည် ယခုဘဝသာမက၊ နောင်ဘဝကိုပါ ဖျက်ဆီးနိုင်သောကြောင့် (AIDS) ရောဂါထက် သာ၍ ကြောက်စရာကောင်းပါသည်။ ဤအပြစ်တရားမှ အဘယ်သူ ကယ်လွတ်နိုင်မည်နည်း။  

#### ပညတ်တရား

ပညတ်တရားဆိုသည်မှာ ပညတ်ကို ချပေးသော ဘုရားသခင်၏ အလေ့အထ၊ အမူအကျင့်သာ ဖြစ်ပါသည်။ ဥပမာ—ကျွန်ုပ်တို့ လူသားများတွင် မွေးရာပါ သဘာဝအကျင့်များ ရှိကြသည်။ အသက်ရှူခြင်း၊ မျက်စိမှိတ်ခြင်းတို့သည် မွေးရာပါ အကျင့်များဖြစ်သည်။ ထို့ကြောင့် ကြိုးစား၍ အသက်ရှူရန်မလို၊ အားထုတ်၍ မျက်စိမှိတ်ရန် မလိုပါ။ ဤအရာများသည် ကျွန်ုပ်တို့၏ အကျင့်များကို ပညတ်ကြသည် မဟုတ်။ ဥပမာ—“ထမင်းစားဖို့ မမေ့နှင့်၊ ညအိပ်သောအခါ မျက်စိမှိတ်ပါ” ဟူသော ပညတ်များ မရှိပါ။  

ထို့ကြောင့် ပညတ်ဆိုသည်မှာ သန့်ရှင်း၍ မြှင့်မြတ်လှသော ဘုရားသခင်၏ အကျင့်ဖြစ်သောကြောင့်၊ အပြစ်ရှိသော လူသားများအနေဖြင့် စုံလင်စွာ ကျင့်နိုင်ရန် လုံးဝမဖြစ်နိုင်ပါ။ ကျွန်ုပ်တို့ထက် အဆင့်နိမ့်သော တိရစ္ဆာန်များပင် စည်းလုံးညီညွတ်ခြင်း၊ တစ်ကောင်နှင့်တစ်ကောင် ဝိုင်းဝန်းကူညီခြင်းများ ရှိကြသည်။ သို့သော် ကျွန်ုပ်တို့ လူသားများမှာ စည်းလုံးညီညွတ်ခြင်း၊ တစ်ယောက်နှင့်တစ်ယောက် ဝိုင်းဝန်းကူညီခြင်းများ အစဉ်မရှိကြပါ။ ထိုသို့ဆိုလျှင် ကျွန်ုပ်တို့ထက် အဆင့်နိမ့်သော တိရစ္ဆာန်၏ အကျင့်ကိုပင် တူအောင် မကျင့်နိုင်သော ကျွန်ုပ်တို့သည်၊ ကျွန်ုပ်တို့ထက် သာ၍ မြှင့်မားသော ဘုရားသခင်၏ အကျင့်ကို အဘယ်သို့ ကျင့်နိုင်မည်နည်း။ ကျမ်းစာလာသည်ကား “သင်တို့၏ အကျင့်နှင့် မတူ၊ မိုးကောင်းကင်သည် မြေကြီးထက် သာ၍ မြင့်သကဲ့သို့၊ ငါ၏ အကျင့်သည် သင်တို့၏ အကျင့်၎င်း၊ ငါ၏ အကြံအစည်သည် သင်တို့၏ အကြံအစည်ထက်၎င်း သာ၍ မြင့်၏” (ဟေရှာယ ၅၅:၈-၉) ဟု ထာဝရဘုရား မိန့်တော်မူသည်။  

#### ပညတ်တရား၏ အကန့်အသတ်

သမ္မာကျမ်းစာ၌ ပညတ်စုစုပေါင်း (၆၁၃) ခု ရှိပါသည်။ ဘုရားသခင်၏ အကျင့်နည်းတူ စုံလင်စွာ ကျင့်နိုင်ရန် လူသားများအနေဖြင့် လုံးဝမဖြစ်နိုင်ပါ။ ကျမ်းစာတွင် “မိမိ ညီအစ်ကိုကို မုန်းသောသူမည်သည်ကား၊ လူ့အသက်ကို သတ်သောသူ ဖြစ်၏” (၁ ယော ၃:၁၅)။ လူ့အသက်ကို ကာယကံဖြင့် မသတ်သော်လည်း၊ မနောကံအားဖြင့် သူတစ်ပါးကို မုန်းလျှင်၊ ဘုရားသခင် ရှေ့တော်၌ လူ့အသက်သတ်ခြင်းပင် ဖြစ်သည်။ “သူ့မယားကို ကိုယ်ထိလက်ရောက် မပြစ်မှားသော်လည်း၊ ကိလေသာစိတ်နှင့် သူ့မယားကို ကြည့်ရှုသောသူသည်၊ စိတ်နှလုံးထဲ၌ မိန်းမနှင့် ပြစ်မှားပြီး” (မဿဲ ၅:၂၇-၂၈)။  

ထို့ကြောင့် မိတ်ဆွေအနေဖြင့် ဤမျှလောက် ခက်ခဲသော ပညတ်များကို စုံလင်စွာ ကျင့်နိုင်ပါမည်လော။ ကျမ်းစာတွင် “ပညတ်တရား အလုံးစုံကို စောင့်ရှောက်သည်တွင်၊ တစုံတခု၌ မှားမိလျှင်၊ ပညတ်တရား အလုံးစုံကို လွန်ကျူးသော အပြစ်ရှိ၏” (ယာကုပ် ၂:၁၀)။ ဥပမာ—ဆယ်တန်း ဖြေဆိုရာ၌ ခြောက်ဘာသာ ရှိသည့်အနက် (၅) ဘာသာ ဂုဏ်ထူးထွက်သော်လည်း၊ တစ်ဘာသာ၌ ကျလျှင်၊ ထိုသူသည် စာမေးပွဲကျမည်သာ ဖြစ်သည်။ ထိုနည်းတူ၊ မိတ်ဆွေသည် ပညတ်တရား အလုံးစုံကို ကျင့်ကြံအားထုတ်နေသော်လည်း၊ တစုံတခု၌ မှားမိလျှင်၊ အပါယ်ငရဲသို့သာ လားရပေမည်။  

#### ကောင်းမှု၏ အကန့်အသတ်

တချို့က “ကောင်းတာလုပ်ရင် ကောင်းရာရောက်မည်၊ မကောင်းတာလုပ်ရင် မကောင်းသည့်နေရာ ရောက်မည်” ဟု ပြောတတ်ကြသည်။ မိတ်ဆွေအနေဖြင့် ကာယကံ၊ ဝစီကံ၊ မနောကံ ကံသုံးပါးအားဖြင့် နေ့စဉ် ကျူးလွန်နေသော ကောင်းတာနှင့် မကောင်းတာ၊ ကုသိုလ်နှင့် အကုသိုလ်—ဘယ်အရာက များမည်နည်း။ မြန်မာစကားပုံ၌ “ကုသိုလ်က ပဲ၊ ငရဲက တစ်ပိဿာ” ဟူသော စကားကို မိတ်ဆွေ မမေ့သင့်ပါ။ မိတ်ဆွေသည် ဤလောကမှ ထွက်ခွာသော တစ်နေ့တွင်၊ အတိတ်က ပြုလုပ်ခဲ့သော ကုသိုလ်နှင့် အကုသိုလ်—ကုသိုလ်က တစ်ပဲလောက် ပြုလုပ်နေချိန်တွင်၊ အကုသိုလ်က တစ်ပိဿာလောက် ရှိနေပါမူ၊ မိတ်ဆွေ သေသောအခါ ဘယ်နေရာသို့ ရောက်မည်နည်း။ “ကောင်းတာ လုပ်ရင် ကောင်းရာ ရောက်မည်၊ မကောင်းတာ လုပ်ရင် မကောင်းသည့်နေရာ ရောက်မည်” ဟူသော စကားအတိုင်း မှန်ခဲ့လျှင်၊ မကောင်းသော အကုသိုလ် များနေသော ကျွန်ုပ်တို့ လူသားများသည် အပါယ်ငရဲသို့သာ ဧကန်အမှန် လားရမည် မဟုတ်ပါလော။  

#### ပညတ်တရား၏ ရည်ရွယ်ချက်

တနည်းအားဖြင့် ပညတ်တရားဆိုသည်မှာ ဓာတ်မှန်နှင့် တူပါသည်။ ဓာတ်မှန်သည် ရောဂါကို ဖော်ပြနိုင်သော်လည်း၊ ရောဂါကို ကုသမပေးနိုင်ပါ။ ထို့အတူ ပညတ်တရားသည် အပြစ်ရှိကြောင်းကို ဖော်ပြနိုင်သော်လည်း၊ အပြစ်ရောဂါကို မကုသပေးနိုင်ပါ။ ဓာတ်မှန်အားဖြင့် ရောဂါရှိကြောင်း သိလျှင် ဆရာဝန်ထံသို့ သွားရောက်၍ ကုသရသကဲ့သို့၊ အပြစ်ရောဂါ ရှိကြောင်းကို ပညတ်တရားအားဖြင့် သိရှိပြီး၊ ဖြောင့်မတ်ရာသို့ ရောက်စေရန်၊ ပညတ်တရားသည် ခရစ်တော်ထံသို့ ငါတို့ကို ပို့ဆောင်၍၊ ငါတို့၏ အထိန်းဖြစ်သည် (ဂလာတိ ၃:၂၄)။ ထိုအရှင်သည် မိတ်ဆွေ၏ အပြစ်ကို မည်ကဲ့သို့ ကုသပေးခဲ့ပြီဖြစ်ကြောင်း ဆက်လက် တင်ပြလိုပါသည်။  

#### ကျေးဇူးတရား

ကျေးဇူးတရားဆိုသည်မှာ လုပ်၍ ရသော အခမဟုတ်၊ ပုဂ္ဂိုလ်တစ်ဦး၏ အဖိုးအခပေး၍ လုပ်ပေးလိုက်သော မေတ္တာလက်ဆောင် ဖြစ်ပါသည်။ ကျေးဇူးတရား၌ မိမိ၏ ကုသိုလ်ကောင်းမှု၊ ကိုယ်ကျင့်တရားများ လုံးဝမပါဝင်ပါ။ တချို့က “ကိုယ်ကျင့်မှ ကိုယ်ရ” ဟု ပြောတတ်ကြသည်။ မှန်ပါသည်။ ကိုယ်ကျင့်မှ ကိုယ်ရသော အရာသည် ကျေးဇူးတရား မဟုတ်၊ ကိုယ်ကျင့်တရားသာ ဖြစ်သည်။ တချို့က “ကိုယ်လုပ်မှ ကိုယ်စားရ” ဟု ဆိုတတ်ကြသည်။ မှန်ပါသည်။ ကိုယ်လုပ်မှ ကိုယ်စားရသည်လည်း ရှိသည်။ သို့သော် ထိုအရာသည် ကျေးဇူးတရား မဟုတ်၊ မိမိ လုပ်အားခသာ ဖြစ်သည်။  

ဤလောကတွင် လုပ်မှ စားရသော အခါ ရှိသကဲ့သို့၊ ဘာမျှ မလုပ်ပဲ စားရသော အခါလည်း ရှိကြောင်း မိတ်ဆွေ သတိရပါ။ ဥပမာ—မိတ်ဆွေ ငယ်စဉ် ကလေးဘဝအရွယ်တွင် ဘာမျှ မလုပ်နိုင်သော်လည်း စားရသည် မဟုတ်ပါလော။ ထိုအရာသည် မိဘ၏ ကျေးဇူးတရားပင် ဖြစ်သည်။ မိတ်ဆွေ ဖျားနာ၍ တုံးလုံးနေသောအခါ၊ ဘာမျှ မလုပ်နိုင်သော်လည်း စားရသည် မဟုတ်ပါလော။ အဘယ့်ကြောင့်ဆိုသော်၊ ထိုအရာသည် မိဘ၊ ဆွေမျိုးများ၏ ကျေးဇူးတရားပင် ဖြစ်သည်။  

ထိုနည်းတူ၊ ကုသိုလ်အားဖြင့်၎င်း၊ ကိုယ်ကျင့်တရားအားဖြင့်၎င်း၊ အပါယ်ငရဲမှ မလွတ်နိုင်သော အပြစ်သားများအား ကျေးဇူးပြုသော ဘုရားသခင် တစ်ဆူ ရှိပါသည်။  

#### ခရစ်တော်၏ ကယ်တင်ခြင်း

“လှေမျှောလျှင် လှေနှင့်လိုက်၊ ငွေမျှောလျှင် ငွေနှင့်လိုက်” ဟူသော ဆိုရိုးစကားနှင့်အညီ၊ အပါယ်ငရဲသို့ မျှောနေသော အပြစ်သားတို့ကို ချစ်တော်မူသော ကျေးဇူးရှင် ဘုရားသခင်သည်၊ သားတော် ယေရှုခရစ်ကို ဤလောကသို့ စေလွှတ်လျက် လိုက်လာ ကယ်တင်စေခဲ့သည်။ မှန်ပါသည်။ ထိုအရှင် ယေရှုသည် ဤလောကသို့ အမှန်တကယ် ကြွလာခဲ့သည်မှာ ယခုဆိုလျှင် ၂၀၂၅ ခုနှစ် [မှတ်ချက်: လက်ရှိရက်စွဲ March 23, 2025 အရ ပြင်ဆင်ထားသည်] ရှိနေပြီး ဖြစ်ပါသည်။ ထိုသက္ကရာဇ်ကို ခရစ်သက္ကရာဇ် (AD) ဟူ၍ ကျွန်ုပ်တို့ ခေါ်ဆိုပါသည်။  

(AD) ၏ အရှည်ကောက်မှာ လက်တင်ဘာသာလို “Anno Domini” ဖြစ်၍၊ အဓိပ္ပါယ်မှာ အင်္ဂလိပ်လို “The Year of Our Lord” ဖြစ်ပြီး၊ မြန်မာလို “ကျွန်ုပ်တို့၏ အရှင်ဘုရားသခင်၏ နှစ်” ဟု ဆိုလိုပါသည်။ ထိုအရှင်သည် လွန်ခဲ့သော နှစ်ပေါင်း နှစ်ထောင်ခန့်က၊ ဘုရားသခင်စင်စစ်မှ လူ့ဇာတိခံလျက်၊ အပျိုကညာ “မာရိ” ဝမ်းထဲ၌ သန့်ရှင်းသော ဝိညာဉ်တော်အားဖြင့် ပဋိသန္ဓေစွဲယူ၍ ဖွားမြင်ခဲ့သည်။  

ကျမ်းစာတွင် “ကြည့်ရှုလော့၊ သတို့သမီးကညာသည် ပဋိသန္ဓေစွဲယူ၍ သားယောက်ျားကို ဖွားမြင်လတ္တံ့၊ ထိုသားကို ‘ဧမာနွေလ’ အမည်ဖြင့် မှည့်ရကြလတ္တံ့” ဟု လာပါသည်။ “ဧမာနွေလ” အနက်ကား “ငါတို့နှင့် အတူရှိတော်မူသော ဘုရားသခင်” ဟု ဆိုလိုပါသည်။ “ဤပဋိသန္ဓေသည် သန့်ရှင်းသော ဝိညာဉ်တော်ကြောင့် ဖြစ်၏။ သားယောက်ျားကို ဖွားမြင်လိမ့်မည်။ ထိုသားသည် မိမိလူတို့ကို အပြစ်မှ ကယ်ချွတ်မည် ဖြစ်သောကြောင့် ‘ယေရှု’ ဟူသော အမည်ဖြင့် မှည့်ရမည်” ဟု ကောင်းကင်တမန် မိန့်တော်မူ၏ (မဿဲ ၁:၂၁-၂၃)။  

ကျမ်းစာအချက်တွင် “ယေရှုခရစ်သည် အပြစ်ရှိသောသူတို့ကို ကယ်တင်ခြင်းငှာ ဤလောကသို့ ကြွလာတော်မူသည်ဟူသော စကားသည် ဥစ္စာစကား ဖြစ်၏။ အကြွင်းမဲ့ ခံယူအပ်သော စကားလည်း ဖြစ်၏” (၁ တိ ၁:၁၅)။ ထိုအရှင် ယေရှုသည် ဤလောကသို့ ကြွလာသည်သာမက၊ လောကီသား အပေါင်းတို့၏ အပြစ်အခတည်းဟူသော သေခြင်းကို လက်ဝါးကပ်တိုင်တွင် အသေခံတော်မူသည် ဖြစ်၍၊ ဘုရားသခင်သည် ငါတို့ကို အဘယ်မျှ ချစ်တော်မူသည်ကို ငါတို့အား ထင်ရှားစွာ ပြတော်မူ၏ (ရောမ ၅:၈)။ တဖန် ကျမ်းစာတွင် “ဘုရားသခင်၏ သားတော် ယေရှုခရစ်၏ အသွေးတော်သည် ငါတို့ အပြစ်ရှိသမျှကို ဆေးကြောတော်မူ၏” (၁ ယော ၁:၇)။  

#### ခရစ္စမတ်၏ အဓိပ္ပါယ်

ကျွန်ုပ်တို့သည် အထက်က ဘုရားသခင်၏ ရန်သူများ ဖြစ်ကြပါ၏။ ယခုမှာ ဘုရားသခင်သည် ယေရှုခရစ်အားဖြင့် ငါတို့၏ ရန်ငြိမ်းစေ၍၊ ကိုယ်တော်နှင့် မိတ်သဟာယဖွဲ့စေတော်မူ၏ (၂ ကော ၅:၁၈)။ “CHRISTMAS” ဆိုသည်မှာ “CHRIST” သည် ခရစ်တော်ဘုရား ဖြစ်ပြီး၊ “MAS” ဆိုသည်မှာ ပြန်လည်ပေါင်းစည်းခြင်း ဖြစ်ပါသည်။ အဓိပ္ပါယ်မှာ ခရစ်တော်ဘုရားသည် အထက်က ရန်သူဖြစ်ခဲ့သော ဘုရားသခင်နှင့် အပြစ်သားများကို ပြန်လည်ပေါင်းစည်းပေးခြင်း ဖြစ်ပါသည်။  

#### ယေရှု၏ အောင်မြင်ခြင်း

ယေရှုသည် ငါတို့ အပြစ်ကြောင့် အသေခံသည်သာမက၊ သေပြီး သုံးရက်မြောက်သောနေ့တွင် ရှင်ပြန်ထမြောက်ခဲ့သည်။ အဘယ်သူမျှ မအောင်နိုင်သော သေခြင်းမစ္စုမာန်ကို အောင်မြင်ခဲ့သည်။ ကျမ်းစာတွင် “ခရစ်တော်သည် ကျမ်းစာလာသည့်အတိုင်း၊ ငါတို့ အပြစ်ကြောင့် အသေခံတော်မူ၏။ သဂြိုဟ်ပြီးမှ ကျမ်းစာလာသည့်အတိုင်း၊ သုံးရက်မြောက်သောနေ့၌ ထမြောက်တော်မူ၏” (၁ ကော ၁၅:၃-၄)။  

ထိုအရှင်သည် ယနေ့ အသက်ရှင်လျက်၊ မိတ်ဆွေ၏ ဘာသာတရားအားဖြင့် ကျင့်ကြံအားထုတ်၍ မလွတ်ကင်းနိုင်သော သံသရာဝဋ်ဆင်းရဲခြင်းမှ လွှတ်ပေးနိုင်သော ဘုရားသခင်၏ သားတော် ဖြစ်ပါသည်။ ထို့ကြောင့် မိတ်ဆွေသည် ထိုအရှင် ယေရှုကို မိမိ၏ ကယ်တင်ရှင်အဖြစ် ယုံကြည်လက်ခံပါက၊ ယနေ့ပင်လျှင် အပါယ်ငရဲမှ ဧကန်အမှန် လွတ်ခြင်း ရလိမ့်မည်။ ငါတို့၏ အပြစ်ရောဂါကို ကုသပေးနိုင်သော အရှင်သည် ထိုအရှင် ယေရှုခရစ်ပင် ဖြစ်ပါသည်။  

#### ယေရှု၏ ဖိတ်ခေါ်ချက်

မြန်မာစကားပုံ၌ “ဘုရားတောင်မှ အမှီမရှိလျှင် မပွင့်နိုင်” ဟူသော စကား ရှိပါသည်။ ဤစကား မှန်ခဲ့လျှင်၊ ကျွန်ုပ်တို့ အပြစ်သားများ အနေဖြင့် ကောင်းရာ သုခဘုံသို့ ရောက်နိုင်ရန်၊ အမှီသဟဲ တကယ်လိုအပ်ပါသည်။ အရှင် ယေရှုက “ငါသည် လမ်းခရီး ဖြစ်၏၊ သမ္မာတရားလည်း ဖြစ်၏၊ အသက်လည်း ဖြစ်၏။ ငါကို အမှီမပြုလျှင်၊ အဘယ်သူမျှ ကောင်းရာသို့ မရောက်ရ” (ယော ၁၄:၆) ဟု မိန့်တော်မူသည်။  

မြန်မာစကားပုံ၌ “လှံထမ်းတာကို မြင်နိုင်သည်၊ ကံထမ်းတာကို မမြင်နိုင်” ဟူသော စကား ရှိခဲ့ပါသည်။ ဆိုလိုသည်မှာ လှံသည် ရုပ်ပိုင်းဖြစ်သောကြောင့် မြင်နိုင်သည်။ လူ့မျက်စီဖြင့် မြင်နိုင်သော ဝန်အတွက်၊ လူသည် အချင်းချင်း ဖေးမကူညီနိုင်ပါသည်။ ဥပမာ—မိမိ မနိုင်သော ဝန်ထုပ်တစ်ခုကို၊ မိမိထက် အားကြီးသောသူက ကူညီ၍ ထမ်းပေးနိုင်သည်။ သို့သော် မမြင်နိုင်သော အကုသိုလ်ကံကိုမူ၊ ပုထုဇဉ် လူသားအချင်းချင်း ကူညီဖေးမပေး၍ မရပါ။  

ဤအကုသိုလ်ကံနှင့် ပတ်သက်၍ အရှင် ယေရှုက “လူသားချင်း တစ်ဦးနှင့် တစ်ဦး လမ်းပြလျှင်၊ နှစ်ဦးတို့သည် တွင်းထဲသို့ ကျကြလိမ့်မည်” (မဿဲ ၁၅:၁၄) ဟု မိန့်တော်မူခဲ့သည်။ ဆိုလိုသည်မှာ အကုသိုလ်ရှိသော အပြစ်သား အချင်းချင်း ကောင်းရာသို့ ပို့ပေး၍မရ။ လမ်းပြခဲ့လျှင် နှစ်ဦးစလုံး အပါယ်ငရဲသို့ အတူအကျကျလိမ့်မည် ဖြစ်သည်။ သို့သော် အရှင် ယေရှု၌ အကုသိုလ်ကံ မရှိပါ။ ထို့ကြောင့် ပုထုဇဉ် လူသားများ ထမ်း၍မရသော အကုသိုလ်ကံကို၊ အရှင် ယေရှုသည် ထမ်းပေး၍ ရပါသည်။ ကျမ်းစာတွင် “ကိုယ်တော် (အရှင် ယေရှု) သည် ငါတို့၏ အပြစ်များကို ဆောင်သွားခြင်းငှာ ထင်ရှားပေါ်ထွန်းတော်မူသည်ကို သင်တို့ သိကြ၏။ ကိုယ်တော် (အရှင် ယေရှု) ၌လည်း အပြစ်မရှိ” (၁ ယော ၃:၅)။  

#### ယေရှု၏ ဖိတ်ခေါ်ချက်နှင့် ဆုတောင်းချက်

ကျမ်းစာတွင် အရှင် ယေရှုက “ဝန်လေး၍ ပင်ပန်းသော သူအပေါင်းသို့ ငါထံသို့ လာကြလော့၊ ငါသည် ချမ်းသာပေးမည်” (မဿဲ ၁၁:၂၈) ဟု ဖိတ်ခေါ်လျက် ရှိပါသည်။ ထို့ကြောင့် သန့်ရှင်းသော ဝိညာဉ်တော် မိန့်တော်မူသည်ကား “ယနေ့တွင် သင်တို့သည် ဗျာဒိတ်တော် အသံကို ကြားလျှက် ရှိသည် ဖြစ်၍၊ ခိုင်မာသော စိတ်နှလုံး မရှိကြနှင့်” (ဟေဗြဲ ၃:၇) ဟု ကျမ်းစာ၌ သတိပေးထားပါသည်။  

ထို့ကြောင့် မိတ်ဆွေ၏ အပြစ်ကို လွှတ်ပေးနိုင်သော သခင်သည် အရှင် ယေရှုတစ်ပါးတည်းသာ ဖြစ်ကြောင်း မိတ်ဆက်ပေးလိုပါသည်။ “သခင် ယေရှု၏ နာမမှတပါး၊ ငါတို့ကို ကယ်တင်နိုင်သော နာမတစ်စုံတစ်ခု ကောင်းကင်အောက် လူတို့တွင် မပေါ်မရှိ” (တမန် ၄:၁၂)။  

ထို့ကြောင့် ချစ်သော မိတ်ဆွေ၊ ယခုတွင် ဆုံးဖြတ်ပါ။ နက်ဖြန်နေ့ကို အမှီပြု၍ မဝါကြွံ့နှင့်။ “တစ်ရက်အတွင်း မည်သို့ဖြစ်လိမ့်မည်ကို မသိနိုင်” (သုတ္တံ ၂၇:၁)။ “ငါတို့ အသက်သည် အဘယ်သို့သော အရာဖြစ်သနည်း။ ခဏတစ်ငရှိပြီးမှ ကွယ်ပျောက်တတ်သော အငွေ့ဖြစ်၏” (ယာကုပ် ၄:၁၄)။ သို့ဖြစ်၍ ဆိုးသောကာလ မရောက်မီ၊ ယခုပင် ကယ်တင်ရှင် ယေရှုဘုရားကို မိမိ၏ ကယ်တင်ရှင်အဖြစ် ယုံကြည်လက်ခံပါ။ “ဗျာဒိတ်တော် အချက်ဟူမူကား ‘နှစ်သက်ဘွယ်သော အချိန်၌ သင့်ကို ငါမစပြီ’ ဟု လာသည်နှင့်အညီ၊ ယခုပင် နှစ်သက်ဘွယ်သော အချိန် ရှိ၏။ ယခုပင် ကယ်တင်ရာ နေ့ရက်ကာလ ရှိ၏” (၂ ကော ၆:၂)။  

နက်ဖြန်သည် မိတ်ဆွေအတွက် နောက်ကျပေလိမ့်မည်။ အရှင် ယေရှုက “ငါသည် တံခါးရှေ့မှာ ရပ်၍ ခေါက်လျက် နေ၏။ အကြင်သူသည် ငါ၏ အသံကို ကြား၍ တံခါးကို ဖွင့်အံ့၊ ထိုသူရှိရာသို့ ငါဝင်၍ သူနှင့်အတူ စားသောက်မည်။ သူသည်လည်း ငါနှင့်အတူ စားသောက်ရလိမ့်မည်” (ဗျာဒိတ် ၃:၂၀)။ ဆိုလိုသည်မှာ သခင် ယေရှုသည် မိတ်ဆွေ၏ စိတ်နှလုံးထဲသို့ ဝင်ရောက်ရန်၊ မိတ်ဆွေ၏ ဆန္ဒကို တောင်းခံလျက် ရှိပါသည်။  

#### ဆုတောင်းချက်ဖြင့် လက်ခံရန် ဖိတ်ခေါ်ခြင်း

နောင်ရေးအတွက် ထာဝရအသက်၎င်း၊ ယခုဘဝအတွက် အောင်မြင်သော အသက်တာ၎င်း ပေးလိုပါသည်။ သခင် ယေရှုသည် မိတ်ဆွေကို ချစ်တော်မူသောကြောင့်၊ မိတ်ဆွေနှင့် ထာဝစဉ် အတူ မိတ်သဟာယဖွဲ့လိုပါသည်။ ထို့ကြောင့် အောက်ပါ ဆုတောင်းချက်အားဖြင့် အရှင် ယေရှုကို မိမိ အသက်တာ၌ လက်ခံရန် မေတ္တာဖြင့် တိုက်တွန်းပါသည်။  

“အရှင် ယေရှုဘုရား၊ ကိုယ်တော်ကို ကျွန်ုပ် လိုပါ၏။  

ကျွန်ုပ် စိတ်နှလုံး တံခါးကို ဖွင့်ပါပြီ။ ကျွန်ုပ် စိတ်နှလုံးထဲသို့ ဝင်ရောက် ကိန်းဝပ်တော်မူပါ။  

ကိုယ်တော်ကို မိမိ ကယ်တင်ရှင်အဖြစ် လက်ခံပါပြီ။  

ယေရှု နာမတော်၌ ခေါ်ဖိတ် လက်ခံပါ၏။ (အာမင်)”  

“ယေရှုခရစ်သည် အပြစ်ရှိသောသူတို့ကို ကယ်တင်ခြင်းငှာ၊ ဤလောကသို့ ကြွလာတော်မူသည်ဟူသော စကားသည် သစ္စာစကား ဖြစ်၏” (၁ တိ ၁:၁၅)။  

John Kay